Read Iban Sirakh 30 Bible Online

Sirakh 30 - Iban bible

Sirakh 30

¹Ngajar Anak Apai ke sayauka anak suah nyipat iya ngambika anak nya nyadika temegah ati iya ila.

²Orang ke ngajar anak iya enggau manah deka puas ati enggau iya. Iya temegah ati ke anak iya ba orang ke bekelala enggau iya.

³Orang ke ngajar anak iya enggau manah, ukai semina temegah ati ba bala pangan iya, tang mega ngasuh munsuh iya malu.

⁴Sekumbang iya idup iya gaga meda anak iya. Lebuh parai iya nadai ati tusah, laban iya enda mati, ketegal iya ninggalka anak ke murih iya.

⁶Iya ninggalka orang malas dendam ngelaban munsuh iya, lalu malas budi bala pangan iya.

⁷Tang orang ke ngasika anak iya deka telih ati. Iya berasai tusah ati tiap kali iya ninga sabak anak iya.

⁸Kuda ti enda dijinakka deka degil. Baka nya mega anak enti enda terit enggau iya.

⁹Orang ke ngasika anak sereta betundi engggau iya, deka lebu lalu tusah ati laban anak nya.

¹⁰Orang ke ketawa enggau anak sida diatu, ila deka nyabakka anak sida, lalu pengujung iya sida ngeritka ngeli nesal ati.

¹¹Anang ngelakka anak nuan ngereja utai peneka ati lebuh iya agi biak, lalu anang ngaga diri enda meda penyalah iya.

¹²Sipat lalu asuh iya ngasika nuan lebuh iya agi mit ngambika iya bebasaka kuasa nuan. Enti enda baka nya, iya deka kering ati lalu enda ngasika nuan.

¹³Nya alai ajar meh anak nuan ngambika iya mereti. Anang ngira tusah ngajar sida ngambika nuan enda pedis ati laban iya ngemalu nuan. Pengerai

¹⁴Manah agi miskin tang gerai nyamai, ari ti kaya tang selalu sakit.

¹⁵Tubuh ti gerai sereta kering lebih agi berega ari mas enggau pengaya.

¹⁶Nadai pengaya lebih ari pengerai tubuh, lalu nadai penyenang lebih ari ati ti gaga.

¹⁷Manah agi parai ari ti idup merinsa ketegal selalu sakit.

¹⁸Pengawa meri pemakai ti nyamai ngagai orang ke sakit raya sebaka enggau pengawa ti ngengkah pemakai atas kubur.

¹⁹Nadai guna ngenahka pemakai ke engkeramba, laban engkeramba enda nemu makai tauka nyium bau iya. Baka nya mega, orang ke diukum ulih Tuhan;

²⁰Iya merening pemakai nya, lalu bedemuh baka orang laki ke diperiri merap indu dara. Gaga Enggau Tusah

²¹Anang alah laban penusah, lalu anang sengaja merinsa diri.

²²Pengelantang ngasuh orang panjai umur, lalu idup senang.

²³Kelantangka ati nuan, lalu gaga. Buai penusah nuan jauh-jauh, laban ati tusah nadai mai penguntung, tang semina ngasuh mayuh orang merinsa.

²⁴Ati ti begedi sereta ringat ngasuh umur pandak. Pengirau ngasuh orang jampat tuai.

²⁵Orang ke senang ati sereta manah pendiau deka amat makai.