Read Iban Sirakh 31 Bible Online

Sirakh 31 - Iban bible

Sirakh 31

¹Penusah Ketegal Pengaya Orang ke selalu irau pasal pengaya enda ulih tinduk, lalu kurus.

²Orang ke irauka penatai pemisi iya enda ulih tinduk. Iya baka orang ke sakit raya.

³Orang kaya bendar gawa nambahka reta. Lebuh sida belelak, sida ngasaika pengaya diri.

⁴Orang miskin bendar gawa, tang nadai utai ulih. Lebuh sida belelak, sida merinsa.

⁵Orang ke tekelalu gila duit enda ulih lepas ari dosa, lalu orang ke ngiga reta deka tesat.

⁶Mayuh orang udah rusak laban duit, lalu sida merinsa ketegal iya.

⁷Duit nyadi panjuk orang ke nyembah iya, lalu orang ke beli disintak panjuk nya.

⁸Beberekat meh orang kaya ti ngiga duit enda enggau jalai ti salah.

⁹Kati nuan bisi tetemuka orang bansa nya? Enti bisi, kami deka muji iya laban iya udah ngereja utai ti nyelai ari orang bukai.

¹⁰Orang ke tan laban penguji ti bansa nya, patut temegah ati. Sapa ke enda ngaga penyalah tauka penyai taja iya bisi peluang?

¹¹Orang ke baka nya sigi idup nyamai, lalu pengawa iya deka dipuji orang ke sama pengarap enggau iya. Adat Basa Maya Makai

¹²Lebuh nuan duduk nunga mija ti penuh pemakai, anang amu, lalu anang nyebut, “Apu, mayuh amat!”

¹³Ingat, orang ke amu mata nadai basa. Ari semua utai ti digaga Tuhan, nadai lebih ari mata ti pengabis amu. Nya meh kebuah mata selalu belaie.

¹⁴Anang ngambi sebarang utai ti dipeda nuan, lalu anang ngambi utai ti deka diambi orang.

¹⁵Selalu bebasaka orang ke begulai makai enggau nuan, baka nuan ti ngarapka diri dibasa orang.

¹⁶Empa manah pemakai ti dienah orang ke nuan. Anang amu makai, enggaika orang begedi meda nuan.

¹⁷Orang ke mereti deka badu makai dulu ari orang. Anang makai dedengam enggaika orang enda nyamai asai.

¹⁸Enti makai begulai enggau orang mayuh, anang berebut nyingkau pemakai.

¹⁹Ba orang ke mereti, makai mimit aja udah chukup, lalu sida enda sendat seput lebuh tinduk.

²⁰Enti nuan tekelalu kenyang makai, nuan deka mutah, pedis perut sereta enggai tinduk. Orang ke makai penumbas iya kenyang, deka tinduk jenak lalu regas dani tumu pagi.

²¹Enti nuan pedis perut ketegal tekelalu kenyang makai, angkat, kemutahka dulu, udah nya nuan deka berasai nyamai.

²²Anak aku, dinga lalu titihka jaku aku, lalu nuan deka ngumbai nya amat beguna. Bejimat meh ngereja semua utai ti dikereja nuan, ngambika nuan bepengerai.

²³Orang ke meri mayuh pemakai dikarindu sereta dipuji orang.

²⁴Tang orang ke rangka deka dibantah semua orang dalam nengeri nya. Anggur

²⁵Anang nyadi orang ke pama ngirup anggur, laban mayuh orang merinsa ketegal nya.

²⁶Besi ti kering diuji dalam api. Baka nya mega orang ke sumbung diuji lebuh iya bekerakar maya mabuk.

²⁷Anggur tau meri peransang, enti enda diirup tekelalu mayuh. Baka ni gaya pengidup enti nadai anggur? Anggur digaga kena ngasuh mensia rami gaga ati.

²⁸Enti diirup ba maya ti patut enggau penumbas iya, anggur ngasuh orang regas sereta rami gaga.

²⁹Tang enti diirup tekelalu mayuh, anggur ngasuh ringat, mangah, lalu deka belaya.

³⁰Enti orang beli mabuk sida nganu orang, lalu ngerugi diri empu. Pengering sida nyau kurang, lalu sida muntang dipedis orang.

³¹Anang mantah pangan nuan ke ngirup enggau nuan. Anang ngemalu iya ngelantangka diri. Jam ny a ukai maya mantah orang tauka nagih sebarang utai.