Read Iban Sirakh 32 Bible Online

Sirakh 32 - Iban bible

Sirakh 32

¹Enti nuan diasuh nyadi tuai ngatur pengerami makai besai, anang ngaga diri baka orang ke beguna amat. Ngaga diri empu baka orang bukai, lalu intu meh pengabang sebedau nuan duduk.

²Udah nuan tembu ngereja semua pengawa ti enda tau enda dikereja nuan, nya baru nuan tau duduk ngelantangka diri begulai enggau orang. Nya baru nuan deka dibasa orang laban udah ngereja pengawa nuan enggau manah.

³Enti nuan tuai umur, nya baru nuan tau bejaku, laban nya sigi patut. Tang nuan mesti bejaku baka orang ke bepenemu, lalu anang nyeleba musik.

⁴Anang bejaku benung pengawa main nyadi, nya ukai maya ti ngena endur nunjukka pemandai nuan.

⁵Baka batu delima digerini enggau mas, baka nya meh reti musik lebuh pengerami ngirup anggur.

⁶Musik ti dimain benung ngirup anggur ti manis baka batu berega digerini enggau mas.

⁷Enti nuan agi biak, nuan tau bejaku enti patut, tang anang lebih ari dua kali, lalu semina nyaut enti ditanya.

⁸Jaku nuan mesti pandak sereta nyemetak. Pandangka diri orang bepenemu tang diau diri.

⁹Ba mua bala pemesai anang nuan ngaga diri sebaka enggau sida, lalu anang seredah enti orang bukai benung bejaku.

¹⁰Baka kilat ti dulu ari guntur baka nya meh nama manah orang ke baruh ati dulu ditemu ari iya empu.

¹¹Pulai meh ari pengerami maya jam chukup, lalu anang nyadi orang ke pengabis dudi. Anang nganti ba mua pintu, tang terus pulai.

¹²Ba rumah nuan empu nuan tau berandau begagai lalu ngereja utai peneka ati nuan, tang anang bedosa ari randau nya.

¹³Kelimpah ari nya beterima kasih meh ngagai Tuhan Pengaga nuan laban Iya ke meri mayuh berekat ti manah. Jalai Nerangka Adat Allah Taala

¹⁴Orang ke nangika Tuhan sigi nerima bantah Iya. Tuhan merekat orang ke dani tumu pagi besembiang ngagai Iya.

¹⁵Barang sapa belajarka Adat Tuhan deka diisi enggau Adat. Tang orang ke pura-pura tesangkut laban iya.

¹⁶Orang ke nangika Tuhan nemu utai ti betul, lalu sida deka ditemu orang ketegal pemanah pengawa sida.

¹⁷Orang ke bedosa enggai nerima bantah, lalu nerangka Adat nitihka peneka ati diri empu.

¹⁸Orang ke mereti ngira genap penemu, lalu orang ke udu sumbung sereta bebegah enda pedulika sebarang utai.

¹⁹Berunding dulu sebedau ngereja utai, nya baru nuan enda nesal ati ketegal pengawa nuan.

²⁰Anang nengah jalai ti tusah enggaika nuan tepantup ba batu dia.

²¹Anang tekelalu andalka jalai ti dipeda nuan manah.

²²Selalu bejaga ba jalai ti ditengah nuan.

²³Bejimat dalam semua kereja nuan; nya baru nuan ngereja pengasuh Tuhan.

²⁴Orang ke arap ke Adat ngasika pengasuh Tuhan, lalu orang ke arap ke Tuhan tetap enda rugi.