Read Iban Sirakh 33 Bible Online

Sirakh 33 - Iban bible

Sirakh 33

¹Orang ke nangika Tuhan enda kena penusah, tang ti bendar iya diselamatka Tuhan lebuh kena penguji.

²Orang ke bepenemu dalam enda begedika Adat, tang orang ke pura-pura enda jenuh baka perau dipangka ribut kudi.

³Orang ke mereti arap ke Adat, baka iya bechayaka jaku nabi.

⁴Sediaka jaku pengelalu nuan, nya baru orang deka ningaka nuan. Sebedau nyaut tusun dulu nama utai ti ditemu nuan.

⁵Runding orang ke beli baka kaki kereta semampai bepusin-pusin.

⁶Pangan ke rindu mantah sigi baka kuda siga; kuda nya memunyi enda milih sapa nepan iya. Semua Orang Enda Sebaka

⁷Nama kebuah bisi hari lebih kudus ari hari ti bukai, taja sepemanjai taun tiap hari sama dipanchar matahari siti nya?

⁸Tuhan Ke Pengabis Nemu ngaga hari enda sebaka, nya kebuah bisi hari pengerami enggau hari besai.

⁹Sekeda hari digaga Iya nyadi hari kudus, lalu hari bukai digaga Iya nyadi hari biasa.

¹⁰Baka Adam, semua mensia digaga ari tanah.

¹¹Tang Tuhan ke bepenemu ngaga mensia enda sebaka, lalu genap iku diberi iya jalai ti enda sebaka.

¹²Bisi mensia diberekat lalu diasuh Iya tinggi, bisi sekeda diasuh Iya kudus lalu dibai semak ngagai Iya. Tang bisi mega mensia dikutuk lalu dikemaruhka sereta dibuai ari endur iya.

¹³Baka tanah liat dijari tukang periuk ke ngaga tanah nitihka peneka iya, baka nya mega mensia di jari Pengaga sida digaga nitihka peneka Iya.

¹⁴Utai ti badas belaban enggau utai ti jai, lalu pengidup belaban enggau pemati. Baka nya mega orang ke bedosa belaban enggau orang ke arap ke Tuhan.

¹⁵Peda meh semua utai ti digaga Tuhan Ke Pemadu Tinggi; semua utai nya digaga sepasang magang, lalu siti belaban enggau siti.

¹⁶Aku empu pengabis dudi datai bekereja, tang aku tetap bejaga baka orang ke ngumpul buah anggur ti ditinggalka sida ke dulu ngetau anggur.

¹⁷Enggau berekat Tuhan aku mujur enggau manah baka orang ke ngumpul buah anggur lalu ulih ngisi pitan anggur.

¹⁸Kita patut nemu aku ukai ngereja nya ke aku empu, tang ke semua orang ke ingin belajar.

¹⁹Dinga meh, lalu peratika jaku aku semua pemesai bansa enggau tuai pengarap. Anang Dikuasa Ulih Orang Bukai

²⁰Sepemanjai umur nuan, anang ngelakka diri dikuasa orang bukai, sekalika nya anak nuan, bini nuan, menyadi nuan tauka pangan nuan. Anang nyerahka keresa nuan ngagai orang bukai, ila nuan nesal lalu deka minta iya pulai baru.

²¹Seagi-agi nuan idup, anang sekali-kali nyerahka penuduk nuan ngagai sebarang orang.

²²Manah agi anak nuan bepanggai ba nuan, ari nuan ke bepanggai ba iya.

²³Nuan mesti ngatur semua pengawa nuan, lalu anang ngelakka nama nuan kamah.

²⁴Bagi reta nuan maya nuan deka parai. Baka ni Enggau Kuli

²⁵Siko keledai patut diberi rumput enggau utai ti dibai iya, lalu dipalu enggau tungkat. Kuli patut diberi makai enggau kereja sereta dijaga enggau atur ti manah.

²⁶Beri meh kuli nuan kereja, nya baru nuan ulih belelak. Enti dilak nadai pengawa iya deka diau aja peneka ati iya.

²⁷Jelu ulih dijinak ngena tali kunkung; lalu kuli ke jai patut didawa lalu diukum.

²⁸Asuh iya bekereja, anang ngasuh iya diau aja, laban enti iya diau nadai pengawa, iya deka berundingka utai ti jai.

²⁹Nya alai asuh kuli nuan gawa, lalu enti iya enggai tanchang iya enggau rantai.Tang anang tekelalu terit enggau sebarang orang, lalu anang ngereja utai ti enda lurus.

³¹Enti nuan bisi kuli, gaga iya baka nuan deka digaga orang, laban iya udah dibeli nuan enggau asil tulang peluh nuan.

³²Gaga iya baka menyadi nuan empu, laban nuan enda ulih idup enti nadai iya.

³³Enti nuan jai enggau iya, lalu iya rari, dini endur nuan ngiga iya agi?