Read Iban Sirakh 34 Bible Online

Sirakh 34 - Iban bible

Sirakh 34

¹Mimpi Nadai Reti Orang ke beli tesat laban nadai pengarap, lalu runding iya ngigau laban mimpi.

²Orang ke bechayaka mimpi baka orang ke deka nangkap kemayang tauka angin.

³Utai ti ayan dalam mimpi semina baka gamal ti ayan ba cheremin.

⁴Utai ti kamah enda ulih mansutka utai ti beresi, lalu baka nya mega utai ti enda amat enda ulih mansutka utai ti amat.

⁵Mimpi, macha nasib enggau tenung semina runding aja, baka ti dipeda indu ke benung radai deka beranak.

⁶anang beratika mimpi, enti iya enda datai ari Tuhan.

⁷Mimpi udah ngasuh mayuh orang tesat; orang ke bechayaka iya deka asa.

⁸Adat ulih dititih taja enda nguna mimpi ti ngasuh orang tesat, lalu penemu-dalam udah chukup manah enti disebut orang ke lurus. Bejalai

⁹Orang ke suah bejalai mayuh utai temu. Orang ke mayuh peneleba, bejaku enggau ati ti mereti.

¹⁰Orang ke kurang peneleba nadai mayuh penemu. Tang lebuh iya suah bejalai iya ulih nambahka pemandai.

¹¹Lebuh aku bejalai, aku meda sereta belajarka mayuh utai, lebih mayuh ari ti disebut aku.

¹²Suah aku kena penusah deka bebadi, tang aku selamat laban mayuh peneleba. Nangika Tuhan

¹³Orang ke nangika Tuhan tetap deka idup, laban sida arap ke Iya ulih nyelamatka sida.

¹⁴Orang ke nangika Tuhan enda kala takut sereta baban, laban Tuhan nyadi pengandal sida.

¹⁵Beberekat meh orang ke nangika Tuhan, laban sida nemu sapa ke dikarapka sida.

¹⁶Tuhan beratika orang ke rinduka Iya; Iya nyadika pengelindung ti kering sereta penyandih ti tegap ke sida. Iya ngibun sida ari angat enggau panas, sereta nulung lalu nyaga sida ngambika sida enda tesangkut lalu labuh.

¹⁷Iya ngasuh ati sida gaga lalu mata sida beperechi. Iya merekat pengidup sida lalu meri sida pengerai. Piring Kudus

¹⁸Orang ke meri piring ngena utai ti ulih enggau jalai ti salah, ngereja pengawa ti salah. Piring orang ke jai enda diterima.

¹⁹Tuhan Ke Pemadu Tinggi enda nerima piring orang ke jai. Taja piring iya mayuh, enda meh iya bulih pengampun.

²⁰Orang ke ngenchuri jelu orang seranta, lalu meri iya nyadika piring sebaka enggau pengawa munuh anak di mua mata apai iya.

²¹Ba orang seranta jelu nya pemakai ti ngidupka sida. Nya alai, enti pemakai nya diambi ari sida, pengawa nya baka ke munuh sida.

²²Enti penatai pengidup orang dirampas tauka gaji kuli ditan, pengawa ti baka nya sama enggau pengawa munuh iya.

²³Enti siku ngaga lalu siku ngerubuh, sigi nadai penguntung, tang semina ngelelak diri aja.

²⁴Enti siku merekat lalu siku ngutuk, sapa ke didinga Tuhan?

²⁵Enti orang meresi diri udah megai bangkai, tang agi megai nya baru, nama guna iya meresi diri?

²⁶Enti orang bepuasa ketegal penyalah iya, tang ngaga dosa baka nya baru, nama guna iya ngemaruhka diri enggau puasa? Sapa ke ningaka sembiang iya?