Read Iban Sirakh 35 Bible Online

Sirakh 35 - Iban bible

Sirakh 35

¹Ngasika Adat sebaka enggau pemanah meri piring ti mayuh, lalu nitihka pengasuh Tuhan sebaka enggau pemanah meri piring pemaik.

²Malas pemanah, sebaka enggau meri piring tepung. Meri sedekah, sebaka enggau meri piring terima kasih.

³Orang ke ngerarika diri ari dosa ngenyenangka ati Tuhan, lalu pengawa nya sebaka enggau meri piring minta ampun ari penyalah.

⁴Anang mai jari puang ngagai Rumah Sembiang, laban Adat ngasuh kitai mai piring.

⁵Enti orang enggau ati lurus meri piring, gemu ari piring nya neritik atas alta, lalu bau rengut iya niki ngagai endur Tuhan Ke Pemadu Tinggi.

⁶Tuhan nerima piring ari orang ke lurus, lalu semampai ingatka nya.

⁷Bebasaka Tuhan enggau ati nelap, lalu anang rangka meri asil ari ketau ti keterubah.

⁸Bai meh genap piring enggau mua ti chiru, lalu serahka pemeri sepuluh peratus enggau ati gaga.

⁹Beri meh ngagai Tuhan ke Pemadu Tinggi pemeri ti setipak enggau pemeri Iya ngagai nuan; beri meh pemeri enggau ati nelap naka ulih nuan.

¹⁰Gaga baka nya laban Tuhan meri upah; Iya deka malas pemadas nuan sampai tujuh kali lipat. Tuhan Sigi Lurus

¹¹Anang nguji nyuap Tuhan, laban Iya enda nerima nya. Anang bepanggai ba piring ti diberi enggau ati ti enda lurus

¹²laban Tuhan nya akim ke enda berat sepiak.

¹³Iya enda berat sepiak dalam pekara orang seranta, lalu ningaka sembiang sida ke dinyakka orang.

¹⁴Iya ningaka sembiang anak patu tauka indu balu ke nusi ngagai Iya utai dalam ati sida.

¹⁵Ai mata nichir ba kuyu indu balu ke nyerauh besalah orang ke ngasuh iya nyabak.

¹⁶Tuhan nerima orang ke bekerejaka Iya, lalu sembiang sida niki datai di langit.

¹⁷Sembiang orang seranta ngerembuska remang, lalu majak ke atas sampai datai ba Tuhan.

¹⁸Sida enda badu ngapa sampai Tuhan Ke Pemadu Tinggi meratika sida, lalu ngakim sereta ngukum orang ke jai.

¹⁹Tuhan deka ngereja nya enggau jampat; Iya enda besabar enggau orang ke jai.

²⁰Iya deka ngukum sekeda bansa, lalu nganchurka orang ke enda nemu kasih.

²¹Raban orang ke sumbung deka dialahka, lalu kuasa orang ke jai deka dirusak.

²²Genap iku orang deka nerima balas setipak enggau runding sereta pengawa sida ti jai.

²³Ulih pengasih Tuhan, Iya deka nyaga nembiak Iya, lalu sida deka gaga.

²⁴Pengasih Iya beguna lebuh maya merinsa, baka ujan ti beguna maya musin kemarau.