Read Iban Sirakh 36 Bible Online

Sirakh 36 - Iban bible

Sirakh 36

¹Sembiang Ke Israel O Tuhan, Allah Taala semua dunya, peda meh kami tu lalu kasihka kami.

²Asuh semua bansa nangika Nuan.

³Tunjuk ngagai bansa bukai ngambika sida meda kuasa Nuan.

⁴Nuan udah ngena kami ngayanka pengudus Nuan ngagai sida. Diatu kena meh sida ngayanka pemesai kuasa Nuan ngagai kami.

⁵O Tuhan, awakka sida nemu utai ti ditemu kami, iya nya, O Tuhan, nadai Allah Taala bukai kelimpah ari Nuan aja.

⁶Beri meh tanda enggau kereja ajih ti baru, lalu tunjukka kuasa Nuan ti bemulia ngagai kami.

⁷Asuh jampat datai maya endur orang muji pengawa Nuan ti besai. Ayanka pengeringat Nuan ti baka api lalu rusak semua munsuh. Rusak magang semua orang ke ngelaban nembiak Nuan.

¹⁰Anchurka bala tuai munsuh ke ngumbai sida aja ke beguna di dunya tu.

¹¹Gumpul meh raban bansa Israel lalu asuh sida pulai baru ngagai tanah pesaka ke enggi sida ari dulu menya.

¹²O Tuhan, kasih meh ke Israel, bansa ke dikumbai nembiak Nuan, lalu sida diaku Nuan nyadi anak tuai.

¹³Kasih meh ke Jerusalem, nengeri ti kudus ti dipilih Nuan nyadi tempat endur Nuan diau.

¹⁴Isi meh nembiak Nuan di Bukit Sion penuh enggau pemesai Nuan sereta nanyi puji.

¹⁵Besaksi meh ngagai nembiak Nuan ke digaga Nuan ari pun, lalu asuh nyadi jaku nabi ti disebut dalam nama Nuan.

¹⁶Upah meh orang ke arap ke Nuan, lalu pandang ngagai orang, bala nabi Nuan tau dikarap.

¹⁷O Tuhan, dinga meh sembiang bala nembiak Nuan setipak enggau berekat Aron ke sida. Udah nya baru semua orang di dunya deka ngaku Nuan aja meh Tuhan, Allah Taala ke meruan selama-lama iya. Milih Bini

¹⁸Tiap bengkah pemakai tau diempa, tang sekeda pemakai nyamai agi ari ti bukai.

¹⁹Baka dilah ti nemu penyamai macham-macham bansa dagin, baka nya mega pikir ti tajam ulih ngelala jaku ti bula.

²⁰Pengelakar mai mayuh penusah, tang orang ke bisi peneleba ulih nyilat utai nya.

²¹Orang indu tau nerima sebarang orang ke laki iya, tang orang lelaki patut bejimat milih indu ke bini.

²²Pemajik gamal indu ngasuh ati orang lelaki gaga, lalu nya lebih ari semua pengingin bukai.

²³Enti jaku iya nelap sereta lembut, laki iya lebih benasib ari orang bukai.

²⁴Enti orang lelaki bebini, iya bulih utai ti pemadu manah - siku bini nyadi penulung, lalu ulih meransang iya.

²⁵Tanah ti enda dipagar deka kena rumpak. Orang ke nadai bini bejalai segau-segau merening kiba kanan.

²⁶Sapa deka bechayaka penerumpak ke bejalai kia-kia, mindah ari nengeri siti ngagai nengeri siti?

²⁷Sapa deka bechayaka penerumpak ke nadai rumah, lalu tinduk tiap malam di sebarang endur.