Read Iban Sirakh 37 Bible Online

Sirakh 37 - Iban bible

Sirakh 37

¹Pangan Ke Enda Amat Sebarang orang tau ngumbai diri pangan nuan, tang bisi sekeda nama aja pangan.

²Lebuh pangan nyadi munsuh, iya mai penusah ti sebaka pemati.

³Tulah nuan ke ngembuan pikir ti jai! Ari ni penatai pikir ti jai nya, sampai iya ulih menuhka dunya tu enggau jalai tipu?

⁴Bisi orang enggau ngasaika penyenang pangan iya. Tang lebuh pangan iya tusah, iya ngalih lalu ngelaban.

⁵Bisi orang semina nulung pangan enti iya bisi penguntung ari pangan iya, tang lebuh dituntung penusah, iya ngerarika diri.

⁶Anang enda ingatka pangan ke nulung nuan maya perang, anang enda ingatka iya lebuh nuan nyau kaya. Bejimat, Anang Ningaka Jaku Lalau Sengapa

⁷Sebarang orang tau meri jaku lalau, tang bisi orang meri jaku lalau ti nguntungka iya empu.

⁸Bejimat meh enggau orang ke ngelalau nuan. Pansik dulu nama tuju iya laban iya mega tentu ngira penguntung diri empu. Kada enda iya musin nuan,

⁹lalu madahka semua nya manah ke nuan, lalu nganti aja utai ti deka nyadi ba nuan.

¹⁰Anang minta ajar orang ke enda dikarapka nuan, lalu anang madahka atur nuan ngagai orang ke kepapas ati.

¹¹Anang berunding enggau indu pasal orang ke mekit iya; enggau orang ke buyan pasal perang; enggau orang dagang pasal betawarka rega; enggau orang ke meli pasal barang ti dijual; enggau orang ke rangka pasal terima kasih; enggau orang ke mangah pasal penelap; enggau orang ke buruk pasal kereja; enggau orang gaji sementara pasal nembuka pengawa; enggau ulun ke buruk pasal pemayuh pengawa. Anang pedulika sebarang jaku lalau ti diberi sida nya.

¹²Tang nuan patut selalu beratika orang ke arap ke Tuhan sereta ngasika pengasuh Iya, orang ke seati enggau nuan, lalu tusah ati lebuh nuan enda mujur.

¹³Nuan patut bechayaka runding ti manah dalam ati nuan, laban nadai utai lebih talukka nuan ari ati nuan empu.

¹⁴Kadang-kadang ati diri empu lebih manah meri penerang ari tujuh orang ke bejaga ba menara ti tinggi.

¹⁵Tang utai ti pengabis beguna, iya nya, besembiang ngagai Iya Ke Pemadu Tinggi ngambika Iya nunjukka nuan utai ti kena, patut dikereja nuan. Penemu-dalam Ti Rurus Enggau Penemu Ngapa

¹⁶Berunding lalu atur dulu, sebedau ngereja sebarang utai.

¹⁷Runding patut ditumpu ngagai empat iti pekara: manah enggau jai, idup enggau mati. Tang kuasa ti tetap dipanggai ba dilah.

¹⁹Bisi orang pandai ngajar orang bukai, tang utai nya enda beguna ba iya empu.

²⁰Bisi orang pandai bejaku tang iya mati keberuran laban dibenchi orang.

²¹Utai nya nyadi laban iya nadai penemu-dalam, nya alai Tuhan enda meri upah ngagai iya.

²²Bisi orang ngumbai diri bepenemu, lalu ngarapka orang bechayaka penemu iya amat betul.

²³Bisi orang ke amat bepenemu nyadi pengajar ke bansa iya empu, lalu utai ulih ari penemu nya amat tau dipechaya.

²⁴Orang ke amat bepenemu baka nya udu dipuji, lalu semua orang ke meda iya ngumbai iya lantang.

²⁵Mensia idup semina sementara aja, tang umur bansa Israel enda ulih dikira.

²⁶Orang ke bepenemu dikarapka bansa iya empu, lalu iya deka dikingatka belama-lama. Nagang Pengingin Nyawa

²⁷Anak aku, sepemanjai umur nuan peresa meh diri empu, lalu peratika ulah nuan ti enda manah, lalu anang ngelakka ulah ti jai majak baka nya.

²⁸Ukai semua utai manah ke genap iku orang, lalu ukai genap iku orang ulih ngasaika penyamai ari semua utai.

²⁹Anang enda nemu puas inginka penyamai sebarang utai, lalu anang bam makai utai.

³⁰Orang ke makai tekelalu kenyang deka sakit, lalu orang ke bam deka pedis perut.

³¹Mayuh orang mati laban tek elalu bam. Kelaungka ulah ti baka nya, nya baru nuan idup lama agi.