Read Iban Sirakh 38 Bible Online

Sirakh 38 - Iban bible

Sirakh 38

¹Penyakit Enggau Ubat Bala doktor patut dibasa laban Tuhan meri sida pengawa ti dikereja sida.

²Pengelandik sida datai ari Iya ke Pemadu Tinggi, lalu ketegal nya sida diupah raja.

³Ketegal penemu sida, nya alai sida beguna amat, lalu udu dibasa bala pemesai.

⁴Tuhan ngaga macham-macham ubat ari utai di dunya tu, lalu orang ke nemu reti utai nya enda ngeleseka iya.

⁵Kati endaka batang kayu ngaga ai tabar ti tau diirup ngambika kuasa Tuhan segenda ditemu?

⁶Tuhan ke meri penemu ngagai mensia ngambika sida muji Iya laban utai nyelai digaga Iya.

⁷Bala tukang ubat nyampur macham-macham ubat lalu doktor nguna ubat nya kena nyumanka penyakit lalu muai pemedis. Nengah jalai nya, Tuhan bekereja enda ngetu; Iya meri pengerai ngagai mensia di dunya.

⁹Anak aku, enti nuan sakit, anang enda pedulika nya. Besembiang ngagai Tuhan, nya baru Iya deka nyumanka nuan.

¹⁰Tuchi ati nuan ari semua dosa, seliahka semua utai ti salah, lalu pengujung iya kereja meh utai ti manah.

¹¹Beri meh menyan enggau piring gandum kena meri terima kasih ngagai Tuhan, lalu beri mega minyak ti naka pemanah.

¹²Lalu kangauka doktor laban iya mega digaga Tuhan. Anang nejuka iya pulai laban nuan begunaka iya.

¹³Kadang-kadang penyampat nuan suman bepanggai ba pengelandik doktor.

¹⁴Doktor mega besembiang ngagai Tuhan ngambika iya ulih ngurangka pemedis orang ke sakit, lalu ngeraika sida.

¹⁵Tang orang ke bedosa ngelaban Allah Taala ke ngaga iya, endang patut sakit. Ngulitka Orang Parai

¹⁶Anak aku, bendar meh nyabakka orang parai kena nunjukka penyinu nuan. Aduka bangkai iya ngena jalai ti patut, lalu anang enda enggau nguburka iya.

¹⁷Bebendar meh nyabakka iya enggau ati sinu. Ulitka iya ngena jalai ti patut pengelama sehari tauka dua hari ngambika nuan enda dibantah orang. Udah nya, kelantangka ati nuan, lalu anang majak tusah ati,

¹⁸laban ati ti tekelalu tusah sereta beraie tau ngerusak pengerai, lalu tau ngujungka pemati.

¹⁹Lebuh kena penusah besai, orang tetap tusah ati, baka pengidup orang miskin ke semampai tusah.

²⁰Anang ngelakka ati nuan ditekan ulih penusah; buai meh pengasai nya lalu ingatka semua kitai mati magang ila.

²¹Ingat meh, orang ke parai endang enda pulai idup baru. Nya alai, ati ti tusah ketegal iya nadai guna, lalu semina ngerusak diri empu.

²²Nuan mega deka parai baka iya. Kemari iya, pagila nuan.

²³Lebuh orang ke parai udah dikubur, anang ingatka iya agi. Udah iya ninggal, kelantangka meh ati nuan. Belajar Enggau Bekereja

²⁴Orang ke bepelajar pasal jaku Allah Taala tau bulih penemu-dalam enti iya chukup jam kena belajar, lalu diberi mimit aja pengawa bukai.

²⁵Baka ni orang deka bepenemu enti iya semina megai radu tanah, rindu megai tungkat pemalu jelu, ngiring chapi lalu kiruh ngereja pengawa nya, lalu jaku randau iya semina pasal nupi jelu?

²⁶Ati iya semina ditumpuka ngagai pengawa ngeradu tanah, ngaga rintai iya rurus sereta meri jelu makai.

²⁷Baka nya mega orang ke rajin ngereja pengawa betukang ngena jari ke bekereja siang enggau malam. Sida ngukir buah tinchin, lalu bejimat ngaga ukir ti manah sereta baru. Sida bendar bekereja ngaga ukir ti sebaka enggau asal iya, lalu bekereja sampai jauh malam deka nembuka utai nya.

²⁸Baka nya mega orang tukang kambuh besi, ke duduk tisi tempan beati-ati berunding ngambuh besi. Kulit iya merah didaing api. Pending iya bengal laban bunyi palu tukul, lalu mata iya meratika penyadi utai digaga iya. Iya bekereja bendar deka nembuka pengawa iya, lalu sampai jauh malam ngelagu utai nya dataika tembu enggau manah.

²⁹Baka nya mega orang tukang periuk ke duduk ba pemusin ti dipusin ngena kaki iya. Iya selalu irauka kereja iya, lalu bekereja bebendar ngambika ulih ngaga mayuh periuk.

³⁰Iya ngelunyu tanah liat enggau kaki nyentukka ulih digaga nyadi utai ngena jari iya. Runding iya ditumpu ngagai pengawa ti ngalus sereta ngelichinka utai ti digaga iya. Iya bekereja sampai jauh malam meresi dapur endur nunu utai nya.

³¹Semua sida nya endang landik, siko-siku sigi landik ba bagi diri empu.

³²Enti nadai sida nya, nengeri enda ulih digaga, lalu orang enda ulih diau tauka idup dia. Tang sida nya enda dipilih nyadi pengari rayat,

³³lalu enda tampak ba pangkat ti besai. Sida enda dilantik nyadi akim lalu enda mereti pasal undang-undang. Sida enda nemu nerangka ajar enggau adat, lalu enda kala ngena jaku sempama,

³⁴tang ketegal kereja sida, dunya tu meruan menyana. Sida mandingka pengawa besembiang sebaka enggau kereja sida.