Read Iban Sirakh 39 Bible Online

Sirakh 39 - Iban bible

Sirakh 39

¹Tang enda sebaka pasal orang ke taluk sereta rajin belajarka adat Allah Taala Ke Pemadu Tinggi. Iya mansik penemu-dalam orang dulu kelia, lalu kiruh beratika jaku nabi.

²Iya ngingatka ajar orang ke beberita, lalu meratika reti jaku sempama.

³Iya ngiga reti ti dalam pasal jaku dalam, lalu ulih nerangka siti-siti bagi ti mar dalam jaku sempama.

⁴Orang ke bepangkat nguna penemu iya, lalu iya begulai enggau orang ke bekuasa. Iya udu bejalai ngagai menua bukai belajarka pendiau mensia pasal utai ti manah enggau ti jai.

⁵Iya dani tumu pagi besembiang ngagai Tuhan ke ngaga iya. Enggau nyawa inggar iya besembiang ngagai Iya Ke Pemadu Tinggi ngambika penyalah iya diampun.

⁶Enti Tuhan ke bekuasa deka, iya sigi diisi enggau pemereti. Iya deka nyebut utai ari penemu-dalam lalu iya besembiang terima kasih ngagai Tuhan.

⁷Iya deka bulih penemu enggau pemutus runding ti tetap, lalu bepikir pasal utai ti dilalaika Tuhan.

⁸Iya deka nunjukka ajar ti diberi ngagai iya, lalu temegah ati ke Adat enggau semaya Tuhan.

⁹Pemereti iya deka dipuji orang mayuh, lalu ketegal nya nama iya deka dikingatka ari serak siti ngagai serak siti.

¹⁰Bansa bukai deka becherita pasal penemu-dalam iya, lalu iya deka dipuji ba mua orang mayuh ke bepengarap.

¹¹Enti umur iya panjai, iya deka ninggalka nama ti manah rita, tang enti iya parai sebedau ditemu orang, nya pen chukup ngemuaska ati iya. Puji Ke Allah Taala

¹²Agi mayuh penemu ti deka dipadah, laban aku endang penuh penemu baka bulan kembung.

¹³Dingaka aku, kita bala anak ke badas; awakka kita mansang baka kayu ros di tebing sungai.

¹⁴Entupang meh baka bungai lili ti bau rengut, awakka rengut iya menuhka endur nya baka menyan. Menanyi lagu muji Tuhan, lalu beri terima kasih ngagai Iya ketegal semua utai ti digaga Iya.

¹⁵Tusi meh mulia kuasa Iya ngena puji terima kasih. Menanyi lagu tu ngena belikan:

¹⁶Naka meh pemanah semua utai ti digaga Tuhan; semua jaku Iya nyadi ba maya ti patut.

¹⁷Anang nanya, “Nama tu? Nama kebuah baka nya?” Semua nya deka disaut ba maya ti patut. Ulih jaku Iya ai lalu begumpul baka ti ditekat nundaka peneka Iya.

¹⁸Nunda jaku Iya semua utai lalu nyadi; pengawa penyelamat Iya endang nadai letak.

¹⁹Iya meda semua utai digaga mensia; nadai utai ulih dipelalaika ari Iya.

²⁰Ari pun datai ke ujung dunya, Iya meda semua utai, nadai utai nyelai ba Iya.

²¹Anang nanya, “Nama tu? Nama kebuah baka nya?” Genap utai digaga endang bisi tuju magang.

²²Berekat Iya baka ai bah ti ngampuhka tanah kering.

²³Iya ngayanka pengeringat ngagai mayuh bansa, baka Iya ke ngubah ai tabar nyadi masin.

²⁴Jalai Tuhan sigi lurus ke orang badas, tang penuh penekul ke orang jai.

²⁵Ari pun kelia Iya ngaga utai ti badas ke orang ke badas, enggau utai ti jai ke orang ke bedosa.

²⁶Tu utai ti beguna amat ke mensia, ai, api, besi enggau garam. Tepung, tusu engggau madu, wain anggur, minyak enggau gari.

²⁷Semua utai nya manah ba orang ke arap ke Tuhan, tang jai ba orang ke bedosa.

²⁸Bisi ribut digaga kena ngukum, chukup balat ulih nginsitka bukit. Lebuh bechara, semua pengering dilepaska, lalu pengeringat Tuhan nyau teduh.

²⁹Jelu mangah, kala enggau ular tedung, pedang ke ngerusak orang ke jai, api, ujan batu, penyakit enggau keberuran, semua tu digaga nyadika ukum.

³¹Semua gaga ati ngasika atur Tuhan, lalu sedia deka gawaka Iya di dunya tu. Lebuh datai ba maya ngereja pengawa, semua nadai enggai.

³²Ari pun dulu suba aku udah arap amat, lalu udah bepikir amat-amat, aku nulis nya:

³³Semua utai ti digaga Tuhan badas magang; Iya nyediaka semua utai ti dipeguna ba maya ti patut.

³⁴Nadai sit i utai tau dikumbai jai ari ti bukai laban semua utai manah magang ba endur ti patut.

³⁵Nya alai diatu, aram menanyi enggau penuh ati gaga lalu muji nama Tuhan enggau nyawa inggar.