Read Iban Sirakh 4 Bible Online

Sirakh 4 - Iban bible

Sirakh 4

¹Anak aku, anang nagang orang ke seranta ngidupka diri, lalu anang ngasuh sida lebu nganti utai ti diguna sida.

²Anang ngasuh orang ke lapar pedis ati, lalu anang ngasuh orang ke seranta tusah ati.

³Anang nuan nambahka penusah orang ke udah ringat. Anang laun meri sedekah ngagai sida ke seranta.

⁴Tulung meh orang ke minta sedekah benung tusah, lalu anang nulak peminta orang ke miskin enggaika sida nyumpah nuan.

⁶Enti sida ke benung tusah ati nyumpah nuan, iya ke ngaga sida deka ningaka peminta sida.

⁷Kereja manah-manah ngambika nuan dikerinduka orang, lalu bebasaka orang ke bekuasa.

⁸Dingaka jaku orang ke miskin, lalu saut sida enggau alus.

⁹Tulung sida ke dinyakka orang, lalu anang takut bejalaika pengelurus.

¹⁰Awakka nuan nyadi apai sida anak patu sereta nulung sida ke balu. Nya baru nuan nyadi anak Tuhan ke Pemadu Tinggi, lalu pengasih Iya lebih ari enggi indai nuan. Rega Penemu Dalam

¹¹Orang ke ngiga Penemu Dalam deka dibun sereta dikemesaika iya.

¹²Orang ke rinduka Penemu Dalam rinduka pengidup. Sebarang sapa dani tumu pagi ngiga iya deka gaga ati.

¹³Orang ke bisi Penemu Dalam deka panjai umur sereta diberekat Tuhan kini-kini endur sida bejalai.

¹⁴Orang ke ngereja pengawa ke Penemu Dalam, ngereja pengawa ke Allah Taala ke Kudus, lalu Tuhan deka rinduka sida ke rinduka Penemu Dalam.

¹⁵Sebarang sapa ke ningaka Iya deka ngakim orang enggau pengelurus, lalu sebarang sapa beratika Iya deka idup enggau ati lantang.

¹⁶Arap meh ke Penemu Dalam, nya baru nuan deka bulih Iya nyentukka peturun nuan ila.

¹⁷Mula-mula Penemu Dalam ngasuh nuan nengah jalai ti mar dataika nuan takut sereta begetar. Nuan diajar iya ngena jalai merinsa, sereta diuji enggau mayuh macham atur sampaika nuan arap ke iya.

¹⁸Penemu Dalam jampat datai ngagai nuan enggau nadai betangguh agi. Semua utai ti dipelalaika deka dipadah ngagai nuan lalu nuan gaga ati laban iya.

¹⁹Tang enti nuan limpang ari iya, iya deka ninggalka nuan, lalu ngelakka nuan merinsa. Arap Ke Diri Empu

²⁰Guna meh peluang ti manah, tang jaga nuan empu ari penyai lalu anang mai pemalu ngagai nuan empu.

²¹Laban pemalu ulih mai orang ngagai dosa, tang pemalu mega ulih mai orang bulih basa enggau pemanah.

²²Anang setanah enggau orang sampaika diri empu rugi, lalu anang ngasuh diri empu tusah laban nuan enda ngereja utai ti patut dikereja nuan.

²³Anang kakang ati bejaku enti asai patut bejaku, lalu anang ngelalaika Penemu Dalam nuan.

²⁴Jaku nuan ngayanka Penemu Dalam enggau pelajar nuan.

²⁵Anang ngelaban utai ti bendar, tang nuan patut malu laban nuan enda nemu utai.

²⁶Anang malu ngaku dosa nuan empu; anang nguji nagang ai anyut.

²⁷Anang ngelakka diri empu dikuasa ulih orang ke beli, lalu anang mega setanah enggau orang ke bekuasa.

²⁸Gadai meh nyawa nuan kena ngeringka utai ti bendar, nya baru Tuhan deka nanahka nuan.

²⁹Anang berani bejaku ngapa tauka buruk enggai ngereja pengawa.

³⁰Anang ngaga diri baka singa di rumah tauka takut ba mua kuli nuan.

³¹Anang jari nuan jampat ngambi utai, tang udah nya enggai meri pulai.