Read Iban Sirakh 40 Bible Online

Sirakh 40 - Iban bible

Sirakh 40

¹Pemerinsa Mensia Idup Genap iku orang patut bekereja bendar, lalu nanggung pengawa ti berat kenyau ari ada datai ke pulai ngagai indai asal, iya nya tanah.

²Semua kitai, berengkah ari raja ke ngena ngepan iya enggau makuta lalu duduk di kerusi rajah ti manah amat, nyentukka orang ke pengabis baruh pangkat, ke ngena gari jai lalu duduk ba tanah, takut sereta irau ngenang hari pemarai kitai. Sepemanjai umur, kitai nempuh pengeringat, dengki, penusah, pengirau, takut mati, dendam enggau betelisih penemu. Lalu maya tinduk, pikir kitai dikachau mimpi jai.

⁶Semina mimit aja awak endur kitai ngetu tauka nadai ngetu sekali. Lebuh tinduk kitai bisi ati bejaga laban dikachau pengirau dalam ati ti nyangka utai deka nyadi. Kitai bemimpi rarika munsuh,

⁷tang lebuh kitai deka kena tangkap kitai tedani lalu lantang ati laban nemu nadai utai nyadi ti ngenakutka kitai.

⁸Tu meh utai ti endang diasaika semua utai idup, baikka mensia tauka jelu, lalu orang ke bedosa ngasaika utai nya tujuh kali berat, iya nya,

⁹pemati, berekak, betelisih penemu, bebunuh, menua kudi, rapar keberuran, pemerinsa enggau penyakit.

¹⁰Semua utai nya digaga ungkup orang ke jai. Sida nya meh ke ngasuh ai bah besai datai.

¹¹Semua utai ti datai ari tanah endang pulai ke tanah, baka ai endang anyut ke tasik. Pengujung Penyai

¹²Utai ti ulih ari makai suap tauka enggau jalai ti enda lurus sigi enda lama, tang utai ti ulih enggau jalai lurus sigi tetap belama.

¹³Reta ti ulih ngena jalai ti enda lurus sigi deka rangkai baka batang ai, lalu laun baka bunyi guntur ti begetar maya ujan kudi.

¹⁴Orang ke manah ati deka gaga, tang orang ke ngelanggar adat deka tusah amat.

¹⁵Purih orang ke jai enda mayuh; sida nya baka utai ti ditanam buruk urat laban tumbuh ba tanah bebatu,

¹⁶tauka rumput ti tumbuh di tebing sungai ti dibantun dulu agi ari babas bukai.

¹⁷Ati ti manah sigi baka utai ditanam ti penuh berekat, lalu ati ti nelap deka puh belama. Utai Ti Manah Amat Ke Mensia

¹⁸Orang ke bisi kereja enggau orang ke rajin bekereja sigi senang dalam pengidup. Tang orang ke tetemuka reta sigi lebih senang agi ari sida nya.

¹⁹Nama nuan deka meruan manah enti nuan bisi tiris pantis tauka enti nuan ngaga nengeri. Tang lebih manah agi enti nuan tetemuka penemu-dalam.

²⁰Wain anggur enggau musik ngelantangka ati, tang manah agi rinduka penemu-dalam.

²¹Kesuling enggau belikan ngasuh lagu ngerinduka ati, tang rindu agi ninga nyawa ti manah.

²²Mata sigi rindu meda utai manah sereta bajik, tang iya deka agi meda sumbuk gandum di umai.

²³Kaban enggau pangan betemu semina ba sekeda maya, tang kaul melaki-bini sigi lebih agi manah.

²⁴Kaban belayan enggau penulung beguna maya tusah, tang lebih manah agi enti selalu meri tulung ngagai orang miskin.

²⁵Mas enggau pirak tau nyamin pengidup, tang berega agi meri jaku lalau ti manah.

²⁶Pengering enggau pengaya ngasuh ati andal, tang lebih manah nangika Tuhan. Orang ke nangika Tuhan nadai utai kurang, lalu enda ibuh ngiga tulung bukai.

²⁷Nangika Tuhan baka kebun ti penuh berekat, lalu meri endur belindung ti lebih mulia. Minta Duit Ari Orang

²⁸Anak aku, anang idup minta duit ari orang, manah agi mati ari ti idup baka nya.

²⁹Enti pemakai nuan diberi orang bukai, nuan empai idup meruan. Nuan ngemalu diri empu enti pemakai nuan bepanggai ba orang. Orang ke pintar sereta bepelajar enggai ngereja utai baka nya.

³⁰Orang ke enda nemu malu rindu minta duit ari orang, taja enda nyamai dalam ati.