Read Iban Sirakh 41 Bible Online

Sirakh 41 - Iban bible

Sirakh 41

¹Pemarai Berundingka pemarai ngenusahka ati orang kaya ke idup senang lantang, ke bisi mayuh reta tengkira, nadai kala irau, lalu nyawa agi deka makai utai.

²Pemarai diterima enggau lantang ulih orang ke idup miskin, ke lemi, ke nyau tuai, ke mayuh kena penusah, ke buta enggau orang ke udah abis ati.

³Anang takutka pemarai. Ingat meh, bisi orang parai dulu, lalu bisi dudi ari nuan.

⁴Pemarai tu endang atur Tuhan ke semua utai idup. Nuan enda ulih ngenggaika peneka Allah Taala Ke Pemadu Tinggi Amat. Ba dunya pemati nadai ngira sekalika nuan idup sepuluh, seratus tauka seribu taun. Pengujung Orang Ke Jai

⁵Bala anak orang ke bedosa ke besai dalam pendiau ti jai deka nyadi orang jai ila.

⁶Sida nya deka lenyau reta pesaka, lalu peturun sida dibenchi ulih orang belama.

⁷Apai ke jai deka disalah bala anak iya laban ketegal iya, sida dikemalu sereta dianu orang.

⁸Tulah kita orang ke jai laban kita enda pedulika adat Allah Taala Ke Pemadu Tinggi!

⁹Nuan ada ngambika dikutuk, lalu udah nuan parai sumpah nya agi ba nuan.

¹⁰Utai ti datai ari tanah pulai ke tanah. Baka nya meh orang ke jai ti kena sumpah lalu rusak pengidup.

¹¹Kita ngulitka orang parai, tang nama jai orang ke bedosa badu dikingatka agi.

¹²Jaga nama manah nuan, laban nama nya deka tan lama agi ari seribu reta mas.

¹³Idup lantang senang bisi letak pengelama, tang nama manah deka tan belama iya. Pemanah Diri Empu

¹⁴Kita anak aku, idup meh nitihka ajar ti dipadah ngagai kita, nya baru kita deka lantang senang. Penemu-dalam ti dilalai sebaka enggau reta ti enda dipeda; dua bengkah utai nya enda diguna.

¹⁵Orang ke ngelalaika pemeli iya manah agi ari orang ke ngelalaika penemu-dalam iya.

¹⁶Ukai semua utai ti ngemalu dikumbai salah magang, lalu ukai utai ti ngemalu betul magang.

¹⁷Nuan patut berasai malu ke apai indai nuan enti nuan ngereja utai ti enda manah; ngagai orang ke bekuasa tauka orang ke bepangkat enti nuan bula

¹⁸ngagai akim enggau orang ke bekuasa enti nuan ngelanggar adat; ngagai bala mayuh enti nuan ngereja utai ti salah; ngagai kaban tauka pangan enti nuan ngereja utai ti enda lurus;

¹⁹ngagai orang ke begulai pendiau enti nuan ngenchuri. Di mua Allah Taala enggau semaya Iya nuan patut berasai malu enti nuan: berenyak enggau siku nuan ba mija makai; ngemalu orang lebuh meri tauka nerima utai;

²⁰enda malas tabi orang bukai; nyeling ngagai indu sundal;

²¹nulak peminta kaban belayan; ngambi ungkup orang bukai tauka ngambi utai ti diberi ngagai orang bukai; merening bini orang bukai;

²²begulai semak enggau kuli indu orang nya - anang semak endur iya tinduk; ngemalu bala kaban nuan; ngemalu orang udah nuan meri iya utai;

²³nusi utai ti didinga nuan; madah ngagai orang utai ti dipelalaika ti ditusi ngagai nuan. Nya meh maya nuan patut berasai malu, nya baru nuan deka dibasa orang.