Read Iban Sirakh 44 Bible Online

Sirakh 44 - Iban bible

Sirakh 44

¹Pemesai Allah Taala Dalam Cherita Lama Aram kitai muji orang ke tebilang manah nama, aki ini kitai ari serak siti ngagai serak siti kelia menya.

²Tuhan meri sida basa ti besai enggau mulia Iya ti endang bisi ari pun.

³Sekeda sida nya nyadi raja ke tampak nama ketegal pengering sida; sekeda sida tebilang laban meri lalau ngena penemu-dalam, lalu sekeda sida nya nilit utai ti deka nyadi dudi ila.

⁴Sida nyadi tuai ngiring bansa ngena jalai ti patut, lalu nemu utai ti patut diajar ngagai rayat ke dipegai sida ngena penemu-dalam.

⁵Sida ngaga lagu ti manah, lalu nulis pantun ti berambai-rambai.

⁶Sida nya meh orang ke kaya sereta bekuasa diau di rumah enggau ati lantang.

⁷Semua sida nya orang ke dikemesaika sereta dibasa orang maya nya suba.

⁸Mayuh sida nya ninggalka nama manah, lalu agi dipuji orang sampai seharitu.

⁹Bisi sekeda enda agi dikingatka, tang lenyau baka ke nadai kala idup. Sida baka ke enda kala ada, lalu baka nya mega bala peturun sida.

¹⁰Tang kitai muji sida ke lurus, ke ngereja pengawa manah ti semampai dikingatka belama.

¹¹Semua pemanah sida agi ditampung peturun sida, lalu nyadi reta pesaka sida.

¹²Bala peturun sida talukka sempekat, lalu semampai nunda aki ini sida.

¹³Peturun sida semampai tampung-menampung lalu nama manah sida meruan belama.

¹⁴Bangkai sida dikubur enggau meruan, lalu nama manah sida dikingatka belama.

¹⁵Penemu-dalam sida ditusi semua bansa, lalu sida dipuji orang ke sama pengarap enggau sida. Enok

¹⁶Enok ngerinduka Tuhan, lalu dibai niki ke serega. Iya nyadi teladan semua orang rebak dudi ke nesal ati. Noah

¹⁷Bisi siku orang benama Noah ke lurus sereta enda dibantah orang. Udah pengerusak besai nyadi, iya ngepunka pengidup baru ke mensia. Ketegal iya, mensia agi bisi idup di dunya tu, pengudah ai bah besai.

¹⁸Tuhan ngaga sempekat ti meruan belama enggau iya: semua utai idup badu agi dirusak ngena ai bah. Abraham

¹⁹Abraham nyadi aki ke tebilang ke semua bansa. Nama iya tampak, nadai banding.

²⁰Iya ngasika Adat Allah Taala Ke Pemadu Tinggi, lalu Tuhan ngaga sempekat enggau iya. Sempekat nya ditanda ba tubuh iya empu. Lebuh diuji iya tetap taluk.

²¹Nya alai, Tuhan bedanji ngena sumpah deka ngasuh peturun Abraham nyadi berekat ke dunya. Lalu bala iya deka betambah mayuh sampaika enda alah tiap baka pasir di tanah enggau bintang di langit. Tanah menua sida ngemesai tasik sepiak ngagai tasik sepiak, ari Sungai Eupratis ngagai ujung dunya. Isak Enggau Jakob

²²Tuhan nyambung sempekat Iya enggau Isak ari apai iya Abraham, udah nya enggau Jakob. Tuhan ngulang danji Iya awakka peturun Abraham nyadi berekat ke semua mensia. Tuhan nentuka ngagai Jakob pasal iya deka diberekat, lalu meri iya tanah pesaka ti patut diempu iya. Tanah nya dibagi iya ngagai duabelas bengkah raban bansa Israel.