Read Iban Sirakh 45 Bible Online

Sirakh 45 - Iban bible

Sirakh 45

¹Moses Ari peturun Jakob, Tuhan ngangkatka siku orang ke lurus dikerinduka orang mayuh. Iya dikerinduka Tuhan enggau mensia. Orang nya Moses, lalu iya dikenang ngena jaku puji.

²Tuhan ngemesaika iya baka melikat, lalu iya diketakutka bala munsuh iya.

³Ulih jaku iya penusah ti nuntung orang Ejip ngetu. Tuhan ngaga iya dibasa bala raja. Tuhan ngayanka Diri ngagai Moses dalam panchar api, lalu meri pengasuh Iya ngagai bala nembiak Iya.

⁴Tuhan milih Moses ari semua mensia, lalu nyiri iya laban iya taluk sereta baruh ati.

⁵Tuhan ngasuh Moses ninga nyawa Iya, lalu mai Moses ngagai remang ti petang. Dia Tuhan berandau enggau iya betunga mua, lalu meri Moses pengasuh Iya, iya nya, Adat ti meri pengidup enggau penemu. Adat nya diberi ngagai Moses, ngambika iya ulih ngajar pengasuh Tuhan ngagai bansa Israel. Aron

⁶Tuhan ngangkatka Aron, siku orang ke kudus baka menyadi iya Moses ari raban Lewi.

⁷Tuhan ngaga sempekat ti meruan enggau iya lalu ngasuh iya nyadi imam ke nembiak Iya. Tuhan ngasuh iya gaga ngena utai ti manah baka pekayan orang besai pangkat,

⁸ti setipak enggau pengawa iya. Aron diberi Tuhan tanda kuasa: tanchut panjai kain linen, baju panjai enggau epod.[27]

⁹Puting kaki baju panjai digerini ngena buah delima enggau gerunung mas ti bemunyi lebuh iya bejalai. Bunyi iya didinga ba Rumah Sembiang lalu tu ngasuh Tuhan ingatka nembiak Iya.

¹⁰Tuhan mega ngasuh Aron ngena baju panjai ti digerini ngena benang mas, redam tuai enggau redam muda, digaga tukang jait, lalu tangkup dada digaga ari Urim enggau Tumim, benang mirah ditenun tukang benang,

¹¹batu berega ti bisi diukir enggau nama. Batu nya dilekat ngagai mas tangkup dada ulih tukang mas ngambi Tuhan ingatka duabelas bengkah raban bansa Israel.

¹²Tuhan meri iya labung ti digerini ngena mas ti bisi ukir jaku tu: “Enggi Tuhan”. Gerini nya sigi digaga jari orang ke landik, lalu chukup manah amat; endang amat bepangkat besai meh orang ke ngena nya.

¹³Dulu ari Aron nadai utai udah bisi ngemanah nya. Kelimpah ari Aron enggau peturun iya, nadai orang kala ngena utai ngemanah nya.

¹⁴Dua kali sehari, enda nemu ngetu, piring disua kena ngenyenangka ati Tuhan.

¹⁵Moses nyiri Aron enggau chara nata minyak atas pala iya. Ngena jalai nya Tuhan ngaga sempekat ti meruan belama enggau Aron enggau peturun iya. Lalu Aron enggau peturun iya deka nyadi imam Tuhan belama sereta merekat bala nembiak iya dalam nama Tuhan.

¹⁶Ari seluruh bala mensia ke nembiak Iya, Tuhan milih Aron aja tau besembiang meri piring sereta nunu menyan ti bau rengut, ngambika Tuhan ingatka bala nembiak Iya lalu ngampun penyalah sida.

¹⁷Tuhan nyerahka pengasuh Iya ngagai Aron lalu meri iya kuasa kena ngaga pemutus ti sah ngambika nyadi saksi ngagai Israel lalu nerangka Adat Iya ngagai sida.

¹⁸Bisi sekali lebuh bala nembiak Allah Taala benung di padang pasir, bisi bala orang luar ke begedi sereta ringat datai ngelaban iya. Bala sida nya, Datan, Abiram, Korah enggau orang ke nyukung sida.

¹⁹Tuhan enggai meda ulah sida nya. Iya ringat amat lalu ngaga kereja ajih kena ngukum sida diempa api.

²⁰Udah nya Tuhan nambahka basa Iya ngagai Aron; nya alai pemeri ari asil ketau ti keterubah diberi ngagai bala imam ngambika sida chukup pemakai.

²¹Bala imam tau makai pemakai ti diberi ke Tuhan; Tuhan ngemendarka Aron enggau peturun iya makai piring ti diberi ngagai Tuhan.

²²Tang Aron nadai bulih tanah pesaka ti tau diempu iya. Tuhan empu meh nyadika pesaka peturun Aron. Pinehas

²³Udah Moses enggau Aron, Pinehas nyadi lumur tiga badas laban iya taluk ngereja pengawa ke Tuhan. Lebuh bala nembiak Israel ngelaban, iya ngenanka diri enda berubah sereta berani, nya alai ketegal nya iya bulih pengampun ke bansa iya.

²⁴Tuhan lalu ngaga sempekat ti tetap belama enggau Pinehas, lalu ngasuh iya nyadi tuai Rumah Sembiang enggau ke bala nembiak Tuhan. Pinehas enggau bala peturun iya deka nyadi Imam Besai ke belama iya.

²⁵Tuhan mega amat ngaga sempekat enggau David anak Jesse ari raban bansa Judah. Pengawa ti nyadi raja sigi ditampung anak lelaki raja baka pengawa imam ditampung peturun Aron.

²⁶Awakka Tuhan meri penemu-dalam ngagai nuan ngambika nuan ulih megai nembiak Iya enggau lurus, ngambika sida tetap mujur, lalu nama sida semampai manah belama ari serak siti ngagai serak siti.