Read Iban Sirakh 46 Bible Online

Sirakh 46 - Iban bible

Sirakh 46

¹Josua Josua anak Nun, soldadu ke kering sereta berani, nyadi nabi nganti Moses. Setipak enggau nama iya, iya nyelamatka bala nembiak ke dipilih Tuhan. Iya ngalahka munsuh ke nyerang bala sida nyentukka Israel ngempu tanah pesaka.

²Naka meh pengering gaya iya lebuh iya nuatka jari nguluka bala ngalahka mayuh nengeri.

³Iya nguluka serang ngarika Tuhan, dulu ari tu nadai orang bisi ngering iya.

⁴Kingatka baka ni iya ngasuh matahari ngetu enda nginsit, lalu ngasuh sehari nyadi dua hari.

⁵Lebuh iya dikelinggi bala munsuh ari sepiak-sepiak, iya besembiang ngagai Tuhan ti Pemadu Tinggi sereta Pemadu Bekuasa. Tuhan ninga sembiang pinta iya, lalu ngirumka ujan batu ti balat amat.

⁶Tuhan ngasuh ujan batu nya balat ninggang sereta ngerusak bala munsuh ba genting Bet Horon, ngambika bansa bukai nemu pengering Josua ke ditulung Tuhan beperang laban iya penuh ati ngasika Tuhan ti Pemadu Bekuasa. Kaleb

⁷Rambau Moses suba Josua endang taluk ngereja pengawa. Josua enggau Kaleb anak Jepuneh ngerara orang Israel ngambi sida badu muchau, lalu nagang sida bedosa.

⁸Ari 600,000 iku orang Israel ke bejalai nengah padang pasir, semina seduai iya aja agi idup, ulih nguluka bansa Israel datai ba tanah pesaka sida, menua ti kaya enggau tanah ti gemu.

⁹Tuhan meri pengering ngagai Kaleb sampai tuai, nya alai iya ulih nengah menua ti bebukit. Peturun iya bempu menua nya nyadi tanah pesaka.

¹⁰Ari nya semua orang Israel meda pemanah talukka Tuhan. Bala Ketuai

¹¹Udah nya bisi bala tuai. Siko-siku sida nya endang tebilang ketegal pengawa ti manah. Sida nya enda kala ngelengkaka Tuhan, lalu enda kala nyembah engkeramba. Sida nya selalu dikenang sereta dipuji.

¹²Awakka nama semua orang ke dibasa kitai, dikingatka belama, lalu nyadi teladan peturun sida. Samuel

¹³Samuel dikerinduka Tuhan. Iya nudukka perintah lalu milih bala tuai megai bansa iya laban iya nabi Tuhan.

¹⁴Iya ngakim bala Israel nitihka Adat Tuhan, lalu Tuhan ngelindung sida.

¹⁵Penaluk iya, mandangka iya amat nabi ke lurus. Orang pechayaka iya amat nabi ari jaku iya ti tau nilit utai.

¹⁶Lebuh dikelingi bala munsuh ari sepiak-sepiak, iya minta tulung Tuhan ti Pemadu Bekuasa sereta meri siku anak bedus ke piring.

¹⁷Nyawa Tuhan didinga bejaku ari serega munyi rauh guntur.

¹⁸Samuel ngerusak bala tuai Tirus enggau Pilistin.

¹⁹Lebuh iya nyau deka parai iya bejaku di mua Tuhan enggau raja ke dipilih iya, “Aku enda kala ngambi utai orang, sepasang kasut enda meh kala.” Nadai siku orang nyalah iya.

²⁰Taja udah parai iya agi nilit baka ni pemarai Raja Saul. Ari dalam kubur, Samuel benabi kena ngemaduka penyai bansa iya.