Read Iban Sirakh 47 Bible Online

Sirakh 47 - Iban bible

Sirakh 47

¹Natan Udah Samuel, Natan nyadi nabi rambau Raja David. Raja David

²David dipilih Tuhan ari semua orang Israel baka gemu diambi ari piring pemaik, lalu diberi ngagai Tuhan.

³Iya bemain enggau singa enggau beruang baka bemain enggau anak domba tauka anak kambin.

⁴Lebuh David agi mit, iya munuh siku orang ke besai amat gamal ngambika bansa iya enda dikeleseka orang. Iya madamka penyumbung Goliat ngena sigi batu ti ditikauka iya ngena pangwang.

⁵Ulih sembiang David, Tuhan ti Pemadu Tinggi meri iya pengering kena munuh soldadu nya ke kering sereta tebilang ngambika bansa bukai bebasaka kuasa nembiak Iya.

⁶Iya dibasa ketegal munuh bepuluh ribu iku munsuh, lalu lebuh iya diangkat nyadi raja, orang muji iya laban iya dipilih Tuhan.

⁷Iya munaska semua munsuh iya, lalu ngalahka orang Pilistin selama-lama iya ngambika sida badu ngeremba.

⁸Dalam semua pengawa Raja David, iya endang muji Tuhan ti Kudus sereta bebasaka Iya ti Pemadu Tinggi. Iya rinduka Tuhan ti ngaga iya lalu enggau pengabis ati iya menanyi muji Tuhan.

⁹Iya ngatur bala penyanyi ba mua alta ngambika bisi musik ti manah didinga.

¹⁰Raja nentuka hari besai sepemanjai taun lalu ngintu hari nya enggau pengerami ti chukup manah. Sehari-hari nya di Rumah Tuhan bisi lagu enda ngetu muji Tuhan.

¹¹Tuhan ngampun penyalah Raja David, lalu negapka kuasa iya belama. Tuhan ngaga sempekat enggau Raja David ngambi iya enggau peturun iya semampai mujur megai perintah Israel. Rajah Solomon

¹²Raja David ditampung anak iya Raja Solomon ke pintar, lalu idup lantang senang laban pemanah apai iya.

¹³Sekumbang Raja Solomon megai perintah, menua alus nadai beperang. Allah Taala ngasuh semua sempadan menua iya alus magang ngambika Raja Solomon ulih ngaga Rumah Tuhan ti tan belama.

¹⁴Amat pintar Raja Solomon lebuh iya agi biak! Pemereti iya baka sungai ti bah.

¹⁵Pemanah iya ngerampit ngagai seluruh dunya; jaku dalam enggau jaku sempama iya dipuji orang di semua endur.

¹⁶Raja Solomon tebilang nama di seluruh dunya sereta dikerinduka laban iya mai pemaik.

¹⁷Di semua nengeri iya dipuji ketegal lagu iya, jaku dalam, jaku sempama enggau penemu iya.

¹⁸Iya ngumpul pirak enggau mas baka ti ngumpul bangkang, semua pengawa dikereja iya dalam nama Tuhan Allah Taala Israel.

¹⁹Tang iya labuh laban pengelemi iya inginka orang indu.

²⁰Iya ngamahka nama diri empu enggau peturun iya. Laban pemeli iya, nya alai Tuhan ringat lalu merinsaka sida.

²¹Perintah iya pechah, lalu orang angkat ngelaban sereta numbuhka perintah siti di Utara Israel.

²²Tang Tuhan semampai manah ati, nya alai Iya enda mungkir danji. Iya enda ngerusak peturun David, orang ke dipilih sereta rinduka Iya. Ketegal nya Tuhan ngelakka sekeda orang Israel ari peturun Raja David meruan idup. Raja Rehoboam Enggau Jeroboam

²³Raja Solomon dikubur begulai enggau aki ini iya. Iya ninggalka anak lelaki siku benama Rehoboam ke nganti iya. Rehoboam nya siku orang Israel ke pengabis beli. Atur iya ngasuh rayat angkat ngelaban perintah iya. Raja Jeroboam anak Nebat ke megai Israel Utara nguluka bala iya bepenyalah.

²⁴Penyalah sida mayuh amat, nyentukka sida dibuai ari nengeri diri empu.

²⁵Sida ngaga mayuh macham penyai, lalu ujung iya, sida diukum Tuhan.