Read Iban Sirakh 48 Bible Online

Sirakh 48 - Iban bible

Sirakh 48

¹Nabi Elijah Lalu datai Nabi Elijah, siku nabi ke beapi-api. Jaku iya baka sempun api ti mau.

²Iya ngasuh penusah kebeluran lapar datai nuntung bansa iya empu. Ketegal iya meh mayuh orang bansa sida empu merinsa dataika mimit aja ti agi idup.

³Bejaku dalam nama Tuhan iya nagang ujan turun, lalu ngasuh api datai tiga kali.

⁴Kereja ajih nuan, Nabi Elijah, chukup nyelai amat. Nadai siku orang ulih ngaga utai baka nuan.

⁵Ngena kuasa Tuhan ti Pemadu Tinggi nuan ngidupka orang ke mati.

⁶Nuan ngerusak bala raja lalu ngelabuhka orang ke benama ari kuasa sida.

⁷Di Bukit Sinai nuan ninga jaku rara Tuhan, lalu ba Bukit Horeb nuan ninga pemutus Iya deka ngukum bala munsuh Iya.

⁸Nuan milih siku raja bejalaika ukum, lalu milih siku nabi nganti nuan.

⁹Nyadi nuan empu diangkat ke serega dalam ribut pulau uchung ti idup baka api ngena kereta ditarit kuda ti beapi-api.

¹⁰Dalam Bup Kudus bisi ditulis madahka nuan deka datai baru ba maya ti udah diletak, ngambi neduhka pengeringat Allah Taala, sebedau Iya mandangka pengeringat diri. Bisi mega ditulis madahka nuan deka mai pemaik entara apai enggau anak sereta mai raban Israel badas baru.

¹¹Beberekat meh orang ke ulih meda penatai nuan, lalu pia mega sida ke parai dalam pengasih, laban kitai tetap deka idup. Nabi Elisa

¹²Elijah dibungkur ribut ti bepusin, lalu kuasa roh iya tama Elisa. Sekumbang iya idup Elisa enda kala takut ke orang ke bekuasa, lalu enda kala alah laban sebarang orang.

¹³Nadai utai mar ba iya. Seumur idup iya, Elisa ngereja pengawa ajih, lalu taja udah parai tubuh agi ngaga kereja ajih.

¹⁵Tang taja pia, agi meh bansa iya enda ngubah chara idup sida ke bepenyalah, dataika sida dibuai ari nengeri diri empu, lalu diachirka di seluruh dunya. Ari bansa sida nya, semina mimit aja agi tinggal lalu dikuasa peturun Raja David.

¹⁶Sekeda sida agi ngasi ngereja utai nitihka Tuhan, lalu sida bukai majak ngaga penyalah. Raja Hesekiah Enggau Nabi Isaiah

¹⁷Raja Hesekiah negapka nengeri iya enggau dinding lalu nyediaka pun penatai ai. Iya ngasuh orang nebuk lubang dalam tanah nengah bukit batu ngena besi, lalu ngaga pegung kena nyimpan ai.

¹⁸Lebuh iya megai perintah, nengeri iya diserang Raja Senakerip. Raja nya ngirum siku pemesai mai pesan nyakap orang di nengeri Jerusalem enggau jaku ti sumbung.

¹⁹Orang Israel nyau ambis ati lalu begetar laban takut. Sida berasai pedis baka indu ke radai deka beranak.

²⁰Tang sida besembiang ngangkatka jari ngagai Tuhan ke penuh pengasih. Ari serega, Tuhan ti kudus jampat ninga sembiang sida lalu ngirumka Nabi Isaiah nyelamatka sida.

²¹Tuhan ngerusak kem orang Asiria, lalu melikat Iya ngelesapka sida,

²²laban Raja Hesekiah ngereja pengawa ti ngerinduka Tuhan, lalu iya bepegai teguh nunda teladan aki iya Raja David. Pengawa nya dikereja iya nitihka jaku nabi besai Isaiah, laban iya arapka utai ti dipeda nabi nya.

²³Nabi nya ngasuh matahari nginsit surut ke belakang, lalu ngemanjaika umur raja.

²⁴Iya ngenyamaika ati orang ke ngulit di Jurusalem. Enggau roh iya ti bemulia, iya meda utai ti deka nyadi dudi ila,

²⁵lalu madahka nama utai ti deka nyadi dataika pemadu timpuh dunya enggau utai ti udu dipelalaika sebedau iya nyadi.