Read Iban Sirakh 5 Bible Online

Sirakh 5 - Iban bible

Sirakh 5

¹Anang Sumbung Dalam Pengaya tauka Dosa Anang bepanggai ba pengaya nuan, ngumbai nya aja chukup, lalu enda bepanggai ba utai bukai.

²Anang nitihka juluk ati nuan taja nuan tulihka utai nya. Anang nitihka peneka pengingin nuan.

³Anang nyebut, “Nadai orang bekuasa atas aku.” Ila Tuhan tetap deka ngukum nuan.

⁴Anang nyebut, “Amat aku udah bedosa, tang Tuhan enda ngukum aku”, laban Tuhan besabar enggau nuan.

⁵Anang majak ngaga dosa siti-siti, laban nuan arapka diri tetap diampun Tuhan.

⁶Anang nyebut, “Pengasih Tuhan endang besai amat, lalu pemayuh-mayuh dosa aku deka diampun Iya.” Tuhan amat bepengasih, tang Iya mega enggai meda orang bedosa.

⁷Berubah jampat ngagai jalai Tuhan, lalu anang nganti-senganti laban pengeringat Iya tau datai sebarang maya ba nuan, lalu nuan deka tusah maya timpuh Iya ngukum nuan.

⁸Anang bepangai ba pengaya nuan ti ulih enggau jalai ti enda lurus, laban pengaya nuan nya nadai guna semimit maya nuan kena penusah. Pengelurus enggau Ngatur Pendiau Diri

⁹Anang nguji deka ngenyenangka ati genap iku orang, lalu anang besetuju enggau genap penemu, laban baka nya meh gaya orang ke bedosa ke bisi ati bebagi dua.

¹⁰Tetap keringka penemu nuan, lalu kereja pengawa nitihka jaku nuan.

¹¹Jampat mendingka utai, tang belubah nyaut iya.

¹²Semina nyaut enti nuan nemu saut iya; tang enti enda nemu, manah agi enda bemunyi.

¹³Jaku nuan ngasuh nuan dibasa tauka dikeleseka orang, lalu jaku nuan tau ngasuh nuan tusah.

¹⁴Anang nuan dikumbai betenahka orang sereta anang ngerembaika berita ti ngenusah orang. Laban penchuri deka malu, tang orang ke bula deka diukum berat.

¹⁵Anang ngereja utai ti salah baikka nya mit tauka besai.