Read Iban Sirakh 50 Bible Online

Sirakh 50 - Iban bible

Sirakh 50

¹Simon Anak Onias Imam Besai Simon anak Onias, ngadu sereta negapka Rumah Sembiang.

²Iya nudukka batu pemun dinding ti tinggi sereta beserak dua, dinding pengenan ngelingi Rumah Sembiang.

³Lebuh iya megai perintah, siti pegung ai ti besai baka tasik ditumbak.

⁴Iya ngaga atur kena nyaga bansa iya, lalu negapka dinding kuta ari serang munsuh.

⁵Iya dipeda besai kuasa ba mua nembiak Tuhan lebuh iya pansut ari Endur ti Pemadu Kudus.

⁶Iya baka bintang pagi di tengah langit, baka bulan kembung,

⁷baka matahari ti manchar Rumah Allah Taala ti Pemadu Tinggi, baka neraja ti bebendang di tengah mua hari datas din,

⁸baka bungai ros musin bungai, baka bungai lili semak mata ai, baka sumbuk kayu ti bau rengut musin kemarau,

⁹baka menyan ditunu, baka pirin mas ti digerini ngena mayuh macham batu intan,

¹⁰baka kayu kana ti lebat buah, baka kayu saipris ti gegiau tinggi ke langit.

¹¹Tengah laman Rumah Sembiang dipeda manah bebendang lebuh Simon ngena ngepan imam besai niki ngagai alta ti kudus.

¹²Lebuh iya nyambut lampang dagin ari jari bala imam bukai, benung iya bediri semak api ba alta, dikelinggi bala sida sebilik, iya dipeda baka kayu saipris Lebanon ti agi biak dikelinggi mayuh kayu nyur.

¹³Semua sida nya peturun Aron ke ngena ngepan imam, bediri di mua semua orang Israel benung nyua piring ngagai Tuhan.

¹⁴Simon ngereja pengawa ba alta ngatur pemeri ngagai Tuhan ti Pemadu Tinggi sereta Pemadu Bekuasa.

¹⁵Iya ngambi mangkuk lalu nuang wain anggur ba kaki alta nyadi piring ti bau rengut ngagai Iya ti Pemadu Tinggi, Rajah semua di bap langit.

¹⁶Bala imam bukai manjung, lalu nyepu terumpit ti digaga ari pirak. Bunyi nyawa iya nyaris amat ngambi didinga Tuhan ti Pemadu Tinggi.

¹⁷Semua orang sertai meremi nyembah Tuhan sida ti Pemadu Bekuasa sereta Pemadu Tinggi.

¹⁸Lalu bala sida ke belagu berengkah menanyi, manah amat bunyi musik sida.

¹⁹Bala orang lalu terus besembiang ngagai Tuhan ti Pemadu Tinggi lalu minta ngagai Iya ti Pemadu Pengasih. Udah pengawa nyembah Tuhan tembu,

²⁰Simon lalu nurun ari alta, lalu ngangkatka jari atas orang Israel lalu merekat dalama nama Tuhan enggau basa.

²¹Bala orang mayuh meremi kedua kali ngambi nerima berekat ari Iya ti Pemadu Tinggi. Kangau Enggau Berekat

²²Diatu puji meh Allah Taala ti atas semua ti ngereja mayuh pengawa besai di sebarang endur. Iya ngangkatka kitai kenyau ari ada lalu meri kitai mayuh pengasih.

²³Awakka Iya meri kitai ati ti gaga lalu ngasuh kitai idup lantang senang di Israel ke selama iya.

²⁴Awakka Iya tetap meri pengasih Iya, lalu nyelamatka kitai ari penusah. Tiga Bansa Ti Dibenchi

²⁵Bisi dua bengkah bansa ti dibenchi aku amat, lalu ti ketiga enda patut dikumbai siti bansa.

²⁶Sida nya orang Edom ke diau di sebelah bukit Seir, orang Pilistin, enggau orang Samaria ke beli. Penemu Dalam Jesus Anak Sirak

²⁷Jesus anak Sirak, uchu Eleasar ari Jerusalem, udah ngumpul ajar ti meri pemereti enggau penemu ba bup tu. Ati iya penuh enggau penemu-dalam.

²⁸Beberekat meh orang ke beratika ajar tu. Sebarang sapa ngasika iya deka bepenemu.

²⁹Orang ke idup belajarka ajar tu deka sanggup nempuh sebarang utai, laban iya idup dalam penampak Tuhan.