Read Iban Sirakh 51 Bible Online

Sirakh 51 - Iban bible

Sirakh 51

¹Lagu Terima Kasih Aku meri terima kasih ke Nuan, O Tuhan enggau Raja, aku muji Nuan, O Allah Taala enggau Pengelepas aku, Aku meri terima kasih ke Nuan

²laban Nuan nulung sereta ngelindung aku, Nuan udah nyelamatka aku ari pemati, ari kena petenah enggau jaku bula ti tau mai penusah, di mua bala munsuh aku Nuan udah nulung aku.

³Ketegal pengasih enggau nama Nuan, Nuan nyelamatka aku ari munsuh ke deka ngerekam aku, ari jari orang ke deka ngelaban aku, ari penusah besai ti nuntung aku,

⁴ari mati sendat seput laban asap api ti ngelingi aku, api ti diidupka orang bukai,

⁵ari penipu enggau pemula, ari jaku petenah ti dipadah ngagai raja, ari pemati ti deka ninggang aku enggau ari lubang kubur ti udah tebuka.

⁷Lebuh aku dikelingi bala munsuh; aku ngiga orang nulung, tang nadai bulih siku.

⁸Nya baru aku ingatka pengasih Nuan, O Tuhan, enggau pengawa ti udah digaga Nuan. Aku ingat endang Nuan ngelepaska orang ke arap ke Nuan, lalu nyelamatka sida ari munsuh.

⁹Ari dunya tu aku minta ngagai Nuan, lalu besembiang ngambika aku dilepas ari pemati.

¹⁰Aku minta ngagai Nuan, O Apai aku, anang ngelakka aku dalam penusah, maya aku nadai daya ngelaban munsuh ke sumbung.

¹¹Aku deka muji Nuan belama, lalu menanyi lagu terima kasih ngagai Nuan, laban Nuan udah ningaka sembiang pinta aku.

¹²Nuan nyelamatka aku ari pengerusak sereta ngelepaska aku ari bebadi. Nya alai, aku meri terima kasih, lalu muji sereta ngemuliaka Nuan, O Tuhan. Ngiga Penemu-Dalam

¹³Lebuh aku agi biak, empai berengkah bejalai, aku ngagai Rumah Sembiang lalu besembiang bebendar minta penemu-dalam. Aku tetap tetemuka iya datai ke ujung pengidup aku.

¹⁵Endang ari biak aku gaga ke penemu-dalam ti mansang baka buah anggur ti mansang mansau. Endang ari mit aku neju kediri empu diiring penemu-dalam.

¹⁶Lebuh aku baru berengkah ninga pasal penemu-dalam, aku nerima iya ti ngembuan mayuh ajar.

¹⁷Aku terus majak belajar sereta bebasaka orang ke udah ngajar aku penemu-dalam.

¹⁸Aku bebendar deka idup bepenemu. Enggau rajin aku ngiga utai ti manah, lalu aku enda lebu.

¹⁹Aku keran deka ngiga penemu-dalam, lalu bejimat talukka Adat Tuhan. Lebuh aku besembiang, aku berasai tusah ati laban aku nemu diri kurang penemu-dalam.

²⁰Tang aku keran amat deka ngulihka penemu-dalam. Aku tetemuka iya ngena jalai ngenyauhka diri ari penyalah. Kenyau ari aku bulih penemu-dalam, aku bulih pemereti, lalu ketegal nya aku enda kala nadai penemu-dalam.

²¹Laban aku ingin amat deka bempu iya, aku diupah enggau mayuh penemu-dalam.

²²Tuhan ngupah aku enggau pengelandik bejaku, lalu aku deka ngena penemu nya muji Iya.

²³Datai meh ngagai aku semua kita ke empai belajar, lalu belajar meh ari aku.

²⁴Nama kebuah nuan agi kurang penemu-dalam, taja nuan udu rinduka iya?

²⁵Dinga meh jaku aku: Enda ibuh begunaka duit ngulihka penemu-dalam,

²⁶amat meh nuan deka belajar, lalu enda irauka penusah. Peluang endang semampai bisi.

²⁷Peda nuan aku; enggau kereja mimit aja, aku udah bulih pengelantang ti besai.

²⁸Taja nuan ngasaika diri bisi penusah ngulihka iya, tang penguntung ti ulih nuan jauh lebih mayuh enti dibanding enggau penusah nuan.

²⁹Gaga ati belama laban pengasih Tuhan, lalu anang malu muji Iya.

³⁰Kereja meh pengawa nuan ba maya ti betul, nya baru nuan deka nerima upah ari Tuhan ba maya ti ditetapka Iya.