Read Iban Sirakh 6 Bible Online

Sirakh 6 - Iban bible

Sirakh 6

¹Anang nyadi munsuh enti nuan sepatut iya nyadi pangan. Nama jai mai pemalu, sama mega enggau orang ke bedosa ke deka bula-bula.

²Anang ngasuh nuan empu dikuasa ulih pengingin, laban nya deka ngerusak semengat nuan. Nuan deka baka kayu ti mati nadai daun enggau buah.

⁴Pengingin ti jai deka ngerusak nuan, lalu ngaga nuan nyadika jaku tundi munsuh. Bepangan

⁵Enti nuan mereti bejaku sereta beradat nuan deka bulih mayuh pangan.

⁶Bepangan meh enggau semua orang tang semina ningaka penemu siku dua aja ti tau dikarap.

⁷Enti nuan deka ngiga pangan, anang beguai arap ke sida; uji dulu sida nya sekalika taluk tauka enda.

⁸Bisi orang deka bepangan enti bisi penguntung, tang lebuh nuan tusah, sida nadai nulung.

⁹Bisi pangan nyau ngelaban ketegal bisi laya, lalu iya ngemalu nuan nusi laya seduai ngagai semua orang.

¹⁰Bisi mega pangan begulai makai enggau nuan, tang iya ngelengkaka nuan maya nuan bisi penusah.

¹¹Lebuh nuan kaya iya ngaga diri baka nuan, lalu ngudar bala kuli nuan.

¹²Tang lebuh nuan nyau merusut iya mutar ngelaban nuan, lalu iya rari ari nuan.

¹³Nyauhka diri ari munsuh nuan, tang selalu bejaga-jaga ari pangan nuan.

¹⁴Pangan ke manah endang baka tempat endur belindung ti selamat. Orang ke tetemuka pangan baka nya endang tetemuka reta ti berega amat.

¹⁵Pangan ke manah nadai ulih kira rega iya, lalu nadai ulih giga banding enggau iya.

¹⁶Iya nya baka ubat ti ngasuh nuan bepegerai. Orang ke nangika Tuhan deka tetemuka pangan baka nya.

¹⁷Orang ke nangika Tuhan ulih nyadi pangan ke manah laban sida manah enggau pangan baka enggau diri empu. Ngiga Penemu Dalam

¹⁸Anak aku, belajar meh lebuh nuan agi biak, nya baru nuan deka bulih Penemu Dalam dataika umur nuan tuai.

¹⁹Ngambika bulih Penemu Dalam nuan mesti gawa bebendar baka orang ke bumai ke nyediaka tanah endur betanamka utai, nya baru nuan tau ngarapka diri bulih asil ti manah. Tang kediatu nuan mesti bebendar mantaika tulang gawa sementara aja dia, udah nya baru nuan jampat bulih asil.

²⁰Orang ke beli nadai pelajar ngumbai mar amat ngulihka Penemu Dalam, lalu sida enda bebendar deka ngulihka iya.

²¹Pengawa nya diasaika sida tekelalu berat, nya alai sida jampat muai Iya.

²²Laban Penemu Dalam setipak enggau nama Iya, lalu nadai mayuh orang tulihka Iya.

²³Anak aku, dinga lalu terima jaku lalau enggau penemu aku.

²⁴Tanchang kaki nuan enggau rantai Penemu Dalam, lalu rasukka kungkung Iya ba rekung nuan.

²⁵San meh Penemu Dalam, lalu anang ringat laban tanchang Iya.

²⁶Giga meh Penemu Dalam enggau pengabis ati nuan, lalu tengah meh jalai Iya enggau pengabis pengering nuan.

²⁷Giga lalu tasat meh Penemu Dalam, nya baru, Iya deka ayan ba nuan. Pigai teguh Penemu Dalam, lalu anang ngasuh Iya meleka ari nuan.

²⁸Nyau penudi iya nuan deka tetemuka pengelantang diberi Penemu Dalam.

²⁹Tanchang Iya nyadika pengelindung nuan ti kuat, lalu pasung Iya nyadika tanda basa ke nuan.

³⁰Kungkung iya kena ngelawa nuan baka mas, lalu tali Iya baka pita ti manah amat.

³¹Penemu Dalam dikena nuan baka baju tanda pemesai pangkat enggau makuta pengaga ati.

³²Anak aku, nuan ulih belajar enti nuan deka. Nuan ulih nyadi pandai enti nuan keran ati.

³³Nuan ulih belajar lalu bepenmu enti nuan deka ninga sereta berati.

³⁴Alai ngiga orang tuai-tuai; giga meh iya ke bepenemu, lalu asuh iya nyadi pengajar nuan.

³⁵Nuan enda atau enda mendingka genap ajar jaku Allah Taala, lalu anang ngelaungka leka jaku ti meri penemu, lenyau ari runding nuan.

³⁶Enti nuan tetemuka orang ke pandai, dani tumu pagi ngelawa iya, lalu suah datai ngagai iya.

³⁷Guna semua awak nuan kena belajar sereta beratika pengasuh Tuhan, nya baru iya meri nuan pemereti enggau Penemu Dalam ti dikedekaka nuan.