Read Iban Sirakh 7 Bible Online

Sirakh 7 - Iban bible

Sirakh 7

¹Mayuh Bengkah Lalau Enti nuan enda ngaga penyai, nadai penyai ninggang nuan.

²Anang ngaga penyalah, nya baru penyalah jauh ari nuan.

³Anang naburka benih ti enda lurus, ila nuan empu deka ngetau tujuh kali lipat buah iya.

⁴Anang minta pangkat tinggi ari Tuhan tauka penuduk besai ari rajah.

⁵Anang ngaga diri badas di mua Tuhan sereta anang ngaga diri pintar di mua rajah.

⁶Anang ingin deka nyadi akim, ila nuan enda chukup kering ngelaban utai ti enda lurus. Enti nuan ngelakka diri dikena orang ke bekuasa, nama nuan ti dikumbai lurus deka rusak.

⁷Anang ngereja penyai ngagai rayat mayuh, lalu anang ngemalu diri di mua orang mayuh.

⁸Anang ngaga dosa ti sebaka dua kali. Laban sekali aja pen nuan ngaga dosa, nya udah meh nuan diukum.

⁹Anang berunding, “Allah Taala ke Pemadu Tinggi deka ingatka pemeri aku ti mayuh amat diberi ngagai Iya, lalu Iya nerima pemeri aku nya.”

¹⁰Anang leju besembiang, lalu anang muai peluang meri sedekah ngagai orang miskin.

¹¹Anang ketawaka orang ke tusah, laban Iya ke Pemadu Bekuasa ngasuh orang ke tusah dikemaruhka, lalu ngangkatka iya baru.

¹²Anang ngaga cherita bula pasal kaban belayan tauka pangan nuan.

¹³Anang sekali-kali bula, laban pemula nya endang enda mai pemadas.

¹⁴Anang bejaku begah-begah ba mua orang tuai lebuh baum, lalu anang ngulang jaku lebuh besembiang.

¹⁵Anang nulak kereja kebun tauka kereja kasar, Allah Taala ke Pemadu Tinggi meri kereja nya ke kitai.

¹⁶Anang begulai enggau raban orang ke bedosa, ingat meh ukum Tuhan tetap deka jampat datai.

¹⁷Ngemaruhka diri empu amat-amat, laban orang ke jai deka diukum ngena api enggau ulat. Kaul enggau Pangan sereta Diri Sebilik

¹⁸Anang mudi pangan nuan ketegal duit, tauka mudi pangan amat nuan ketegal mas.

¹⁹Anang muai peluang jadi enggau indu ke manah sereta pintar, laban iya lebih berega ari mas.

²⁰Anang jai enggau kuli ke ngereja pengawa iya enggau manah, tauka orang gaji ke rajin bekereja ke nuan.

²¹Kasihka kuli ke pintar, lalu anang tekelalu nyekat iya.

²²Tupi meh jelu nuan enggau manah, lalu ibun meh jelu nya enti meri penguntung ke nuan.

²³Enti nuan bisi anak, ajar meh sida ngambi ngasi sereta mereti kenyau ari mit.

²⁴Enti nuan bisi anak indu, jaga meh iya ngambi tetap tuchi. Anang tekelalu nitihka peneka iya.

²⁵Enti nuan ngasuh iya belaki, nuan udah tembu ngereja pengawa ti beguna amat. Tang asuh iya jadi enggau lelaki ke mereti.

²⁶Enti nuan bisi bini ke manah, anang nyarak iya. Tang nuan anang nyerahka diri ngagai orang ke enda dikerinduka nuan.

²⁷Bebasaka apai nuan enggau pengabis ati nuan, lalu anang enda ingatka pemerinsa indai nuan lebuh iya beranakka nuan.

²⁸Ingat, nuan anak sida. Baka ni jalai nuan deka malas semua budi sida? Bala Imam

²⁹Nuan anang enda nangika Tuhan enggau pengabis ati sereta bebasaka bala imam Iya.

³⁰Rinduka Tuhan Pengaga nuan enggau pengabis pengering nuan, lalu anang enda pedulika orang ke ngereja pengawa Iya.

³¹Kemesaika Tuhan sereta bebasaka bala imam Iya. Beri ngagai sida utai ti diasuh kereja nuan baka asil tanah ari ketau keterubah, piring kena ngampun dosa, pah jelu persembilian, sereta semua persembilian enggau pemeri bukai ti ditetapka. Orang Miskin enggau Orang Tusah

³²Tulung meh orang ke miskin, nya baru nuan deka nerima mayuh berekat Tuhan.

³³Nuan anang enda manah ati enggau semua mensia, lalu anang enda ingatka orang ke udah mati.

³⁴Anang enda sinu enggau orang ke tusah, lalu sama ngulit enggau orang ke ngulit.

³⁵Anang kakang ngabas orang ke sakit, laban ketegal kereja manah nya nuan deka bulih pengasih.

³⁶Dalam semua utai ti dikereja nuan, anang enda ingatka diri deka parai ila, nya alai seagi-agi nuan ingatka utai tu, nuan enggai ngaga dosa.