Read Iban Sirakh 8 Bible Online

Sirakh 8 - Iban bible

Sirakh 8

¹Ngena Runding ti Manah Anang ngelaban orang ke bekuasa, ngambika nuan enda dikuasa sida.

²Anang belaya enggau orang kaya, ngambika sida enda naka ulih ngelaban nuan. Mayuh orang udah rusak laban mas, lalu bala raja nyau enda lurus laban nya.

³Anang bekelikuh enggau orang ke pejaku, laban pengawa nya baka ke nabakka kayu ngagai api.

⁴Anang betundi enggau orang ke enda beradat, ngambika sida enda bejai aki ini nuan.

⁵Anang mantah orang ke benung berubah ari dosa. Ingat semua kitai orang ke bepenyalah.

⁶Anang ngumbai orang tuai nadai guna, laban sekeda kitai mega deka tuai jemah ila.

⁷Anang gaga ati meda orang siku nya parai; ingat meh semua kitai parai ila.

⁸Anang enda pedulika utai ti disebut orang ke bepenemu. Pelajarka jaku sida nya, ngambika nuan nyadi orang ke pandai lalu ulih gawaka orang ke bekuasa.

⁹Peratika jaku orang ke tuai, laban sida nya belajar ari aki ini sida. Nuan belajar ari sida jalai nyaut ba maya ti ngena.

¹⁰Anang ngidupka pengingin orang ke bedosa, ila nuan sama kena rampit.

¹¹Anang begulai enggau orang ke sumbung, ila sida mutarka jaku nuan kena ngelaban nuan.

¹²Anang nyale utai ngagai orang ke lebih bekuasa ari nuan, enti nuan nyale utai ngagai iya, utai nya kira lenyau aja.

¹³Anang nyadi jamin utang orang bukai enti penyampau iya lebih ari ti ulih bayar nuan. Enti udah tekeranjur, nuan patut besedia mayar iya.

¹⁴Anang nawa akim laban iya tetap menang ketegal penuduk iya.

¹⁵Anang begulai bejalai enggau orang ke berani kempang sengapa, laban iya semina ngenusah nuan aja. Iya deka ngereja utai nundaka peneka ati iya, lalu nuan deka mati ketegal pemeli iya.

¹⁶Anang belaya enggau orang ke rengkal, lalu anang bejalai kediri enggau iya ngagai endur ti sunyi. Orang ke baka nya rindu kasar enggau orang laban nyawa nadai reti ba iya, lalu iya berani munuh nuan ba endur ti nadai orang.

¹⁷Anang minta penemu ari orang ke beli, laban iya deka nusi utai nya.

¹⁸Anang sekali-kali ngereja utai ti dipelalai ba mua orang ke enda dikelala nuan, laban nuan enda nemu utai ti deka diperitaka iya.

¹⁹Anang sekali-kali madah ngagai sebarang orang utai dalam ati nuan, lalu anang ngadang diri nerima pemanah ari sida.