Read Iban Isaiah 1 Bible Online

Isaiah 1 - Iban bible

Isaiah 1

¹ Bup tu ngundan pesan pasal menua Judah enggau nengeri Jerusalem, ti dipandangka Allah Taala ngagai Isaiah anak Amos, lebuh Usiah, Jotam, Ahas, enggau Hesekiah nyadi raja menua Judah.

²Ku TUHAN bejaku, “Tanah enggau langit, pendingka utai ti disebut Aku! Bala anak ke diibun Aku, udah angkat ngelaban Aku.

³Jelu sapi nemu sapa ke bempu sida, lalu jelu keledai nemu endur alai tuan sida meri sida makai. Tang nembiak Aku orang Israel enda nemu sapa tuan sida. Sida endang enda mereti.”

⁴Kita deka diukum, kita bansa ti jai! Dosa kita ngasuh kita labuh! Kita udah nulak TUHAN Allah Taala ke disembah orang Israel ti kudus, lalu kita udah nguingka belakang kita ngagai Iya.

⁵Nama kebuah kita majak angkat ngelaban Iya? Kati kita minta diri diukum balat agi? Israel, pala kita nyau abis bakal, lalu ati enggau runding kita sakit.

⁶Kenyau ari punjung pala nyentuk ngagai ujung kaki, tubuh kita abis sakit. Tubuh kita rajai, kuris sereta telih. Bakal kita apin diberesi tauka dibalut. Nadai ubat udah kala diunsut ngagai telih kita nya.

⁷Menua kita udah dirusak, lalu nengeri kita udah abis retung diempa api. Mata kita peli-peli ngapa meda orang bansa bukai ngerampas lalu ngerusak menua kita.

⁸Ka semina Jerusalem aja ti agi tinggal, nengeri ti dikelulung munsuh, nengeri ti nadai daya nyaga diri baka langkau jejaga ti ba kebun anggur, tauka bansal ba kebun entimun.

⁹ Enti TUHAN ti Pemadu Bekuasa enda nejuka sekeda orang idup, Jerusalem tetap udah abis dirusak, baka Sodom enggau Gomorah

¹⁰Jerusalem, bala pemerintah nuan, enggau bala nembiak nuan sebaka enggau orang Sodom enggau orang Gomorah. Pendingka utai ti disebut TUHAN ngagai kita. Peratika utai ti diajar Allah Taala kitai ngagai kita.

¹¹ Ku Iya bejaku, “Kati kita ngumbai Aku rinduka semua piring ti seruran diberi kita ngagai Aku? Aku leju meda jelu bedus ti ditunu kita nyadika piring, enggau lemak ari jelu kita. Aku leju diberi kita darah sapi, enggau darah bedus enggau darah kambin.

¹²Sapa ngasuh kita mai utai nya lebuh kita datai nyembah Aku? Sapa ngasuh kita ngelunjak Rumah Aku?

¹³Nadai guna kita mai piring. Aku nyau deka mutah ensium menyan ti ditunu kita. Aku enda tan natka Gawai Anak Bulan kita, Hari Sabat kita, enggau gawai pengarap kita. Semua utai nya udah kamah magang laban dosa kita.

¹⁴Aku begedika Gawai Anak Bulan kita, enggau hari kudus kita. Utai nya semina ngasuh ma aku berat, lalu Aku lelak mai utai nya.

¹⁵“Lebuh kita ngangkatka jari kita besampi, Aku enggai malik ngagai kita. Taja pen kita bebendar besampi, tang enggai meh Aku mending, laban jari kita dibalut darah.

¹⁶Basu diri empu datai ke kita tuchi. Badu agi ngereja penyai ti dipeda Aku kereja kita. Anang agi ngereja penyai

¹⁷lalu belajar ngereja utai ti ngena. Pejalaika atur ti lurus - tulung orang ke kena tekan, jaga hak orang ke nadai apai indai, lalu jaga indu ke balu.”

¹⁸Ku TUHAN bejaku, “Aram kitai ngatur pekara tu. Kita nyau mirah dibalut dosa, tang Aku deka masu kita tuchi baka seleju.[1] Taja pen kita nyau mirah-redam, kita deka nyadi burak baka bulu bedus.[2]

¹⁹Enti kita deka ngasika Aku, kita deka makai utai ti manah di menua tu.

²⁰Tang enti kita ngelaban aku, kita deka diukum mati. Aku ti TUHAN, udah bejaku.”

²¹Nengeri ti tetap ati dulu menya, diatu diau baka indu sundal! Dulu menya nengeri nya udah penuh laban orang ke lurus, tang diatu semina bala pemunuh aja ti agi tinggal.

²²Jerusalem, dulu menya nuan baka pirak, tang diatu nuan nadai agi rega. Nuan menya baka wain ti manah, tang diatu nuan semina ai amat aja.

²³Bala tuai kita nya orang ke angkat ngelaban, pangan orang ke penchuri. Sida endang selalu nerima pemeri enggau makai suap. Sida nadai kala bejaku dalam kot ngeringka orang ke nadai apai indai, tauka mending lebuh bala indu ke balu bejaku ngarika diri empu.

²⁴Nya alai, diatu pendingka utai ti disebut TUHAN ti Pemadu Bekuasa, Allah Taala ti bekuasa ti disembah orang Israel: “Aku deka malas kita ke munsuh Aku, ngambika kita enda agi ngenusahka Aku.

²⁵Aku deka ngelaban kita. Aku deka nuchi kita baka ke nuchi besi, lalu deka muai semua pengamah kita.

²⁶Aku deka meri kita pemerintah enggau penyanding penemu, baka sida ke dulu kelia. Nya baru Jerusalem deka dikumbai lurus, nengeri ti tetap ati.”

²⁷Laban TUHAN endang lurus, Iya deka nyelamatka Jerusalem enggau semua orang dia ke nesal ati.

²⁸Tang Iya deka ngeredakka semua orang ke bedosa, ke angkat ngelaban Iya. Iya deka munuh semua orang ke ninggalka Iya.

²⁹Kita deka nesal ati ke diri ti udah nyembah kayu, lalu udah ngaga kebun ke petara kita.[3]

³⁰Kita deka layu baka kayu oak ti mati, baka kebun ti nadai kala diberi ai.

³¹Baka rumput ti rangkai ti diselup perechi api, baka nya meh orang ke bekuasa deka dirusak ulih pengawa sida empu, lalu nadai orang ulih nagang pengerusak nya nyadi.