Read Iban Isaiah 10 Bible Online

Isaiah 10 - Iban bible

Isaiah 10

¹Tulah meh kita ke ngaga adat ti enda lurus, ke nekanka pengidup bala nembiak Aku.

²Nya meh jalai kita nagang orang ke seranta bulih hak enggau atur ti lurus. Nya meh jalai kita ngerampas pesaka indu ke balu enggau orang ke nadai apai indai.

³Nama utai ti deka dikereja kita, lebuh Allah Taala ngukum kita? Nama utai ti deka dikereja kita, lebuh Iya ngasuh penusah ti besai datai nuntung kita ari menua ti jauh? Kini ke tunga kita deka rari ngiga tulung? Dini alai kita deka ngelalaika pengaya kita?

⁴Kita deka mati beperang, tauka diirit nyadi orang tangkap. Tang taja pia, TUHAN mengkang enda badu ringat. Jari Iya deka mengkang dikedarka deka ngukum.

⁵ Ku TUHAN bejaku, “Tulah meh kita orang Asiria, ti dikena Aku nyadi pemalu, ti dikena Aku ngukum sida ke alai Aku ringat.

⁶Aku ngasuh Asiria nyerang bansa ti enda arapka Allah Taala, bansa ti udah nyungkak Aku ringat. Aku ngasuh orang Asiria ngerumpak sereta ngenchuri, lalu ngelunjak bansa orang nya baka ke ngelunjak tanah luchak ba jalai raya.”

⁷Tang raja menua Asiria bisi pelan ti jai dalam ati iya. Iya udah mutuska runding deka ngerusak mayuh bengkah bansa.

⁸Ku iya temegah bejaku, “Genap iku bala tuai soldadu aku endang raja magang!

⁹Aku udah ngalahka nengeri Kalno enggau nengeri Karkemis, nengeri Hamat enggau nengeri Arpat. Aku udah ngalahka Samaria enggau Damaskus.

¹⁰Aku udah ngedarka jari aku ngukum perintah ti nyembah engkeramba, ti mayuh agi ari engkeramba di Jerusalem enggau di Samaria.

¹¹Aku udah ngerusak Samaria enggau semua engkeramba iya, lalu aku deka ngereja baka nya mega ngagai Jerusalem, enggau ngagai anak patung ti disembah orang dia.”

¹²Tang ku TUHAN bejaku, “Lebuh Aku tembu ngereja utai ba Bukit Sion enggau di Jerusalem, Aku deka ngukum raja menua Asiria laban iya udah temegah sereta sumbung.”

¹³Ku raja menua Asiria temegah bejaku, “Aku udah ngereja semua utai nya kediri aku aja. Aku kering, bepenemu-dalam sereta pintar. Aku udah muai semua garis entara menua mayuh bengkah bansa, lalu ngambi bekal ti udah ditaruh sida. Baka sapi ti lelaki, aku udah ngelunjak orang ke diau dia.

¹⁴Bansa dalam dunya tu baka sarang burung, lalu aku udah ngumpul pengaya sida ngemudah orang ke ngumpul telu. Siti pen nadai ga sayap engkebap muru aku. Mulut sida enda dibuka merak aku!”

¹⁵Tang ku TUHAN bejaku, “Kati kapak ulih ngumbai diri besai agi ari orang ke ngena iya? Kati penyayat beguna agi ari orang ke ngena iya? Pemalu bait enda ngedarka orang, tang orang ke ngedarka pemalu bait.”

¹⁶TUHAN ti Pemadu Bekuasa deka ngirumka penyakit kena ngukum sida ke diau makai nyamai. Api ti enda nemu padam deka seruran menyadi dalam tubuh sida.

¹⁷Allah Taala ti penampak orang Israel, deka nyadi api. Allah Taala ke disembah orang Israel ti kudus deka nyadi daun api, ti deka, dalam sehari aja nganguska semua utai, nyengkaum duri enggau tekurak.

¹⁸Utan ti tebal enggau tanah umai deka dirusak magang, baka penyakit ti ngasuh orang mati.

¹⁹Semina mimit aja kayu agi tinggal datai ke anak mit ulih ngitung sida.

²⁰Maya deka datai alai orang Israel ti agi idup, deka badu agi nyandih ba bansa ti nyau deka ulih ngerusak semua sida. Sida deka manggaika pengarap sida ba TUHAN Allah Taala ke disembah orang Israel ti kudus.

²¹Ka semina mimit aja orang Israel deka pulai baru ngagai Allah Taala sida ke bekuasa.

²² Taja pen diatu orang Israel nyau ngemayuh pasir ti ba tebing tasik, ka semina mimit aja sida deka pulai baru. Pengerusak endang digalau ke orang mayuh, lalu nya endang patut.

²³Sigi amat, TUHAN ti Pemadu Bekuasa deka ngasuh pengerusak nyadi di serata menua tu, munyi ti udah dipadahka Iya.

²⁴Ku TUHAN ti Pemadu Bekuasa bejaku ngagai bala nembiak Iya ti diau di Sion, “Anang takutka orang Asiria, taja pen sida nekanka pengidup kita baka ke udah dikereja orang Ejip menya.

²⁵Enda lama da agi, Aku deka tembu ngukum kita. Udah nya baru Aku ngerusak sida.

²⁶Aku TUHAN ti Pemadu Bekuasa, deka nyipat sida ngena penyipat Aku, baka Aku ke nyipat orang Midian ba Batu Orep. Aku deka ngukum menua Asiria baka Aku ti udah ngukum menua Ejip.

²⁷Lebuh maya nya ila, Aku deka ngelepaska kita ari kuasa orang Asiria, lalu kungkung sida enda agi nating bau kita.”[18]

²⁸Bala soldadu munsuh udah ngalahka nengeri Ai![19] Sida datai nengah Migron! Sida ninggalka bekal sida di Mikmas!

²⁹Sida melunggang genting, lalu bemalam di Geba! Orang di nengeri Ramah balat amat takut, lalu orang mayuh udah rari ari Gibe-ah, iya nya nengeri ada Raja Saul.

³⁰Manjung meh kita orang Galim! Awakka kita orang Laisah mending! Nyaut meh kita, orang Anatot!

³¹Orang di Matmenah enggau di Gebim rari ngidupka nyawa diri.

³²Sehari tu bala munsuh bisi di nengeri Nop, lalu sida ngedarka jari sida dia nyakap Bukit Sion, ti ba nengeri Jerusalem.

³³TUHAN Allah Taala deka ngasuh sida merentum labuh baka dan ti ditetak ari kayu. Orang ke pemadu sumbung, ke pemadu tinggi pangkat ari bala sida, deka ditebang lalu dipechat.

³⁴TUHAN deka nebang sida baka ke nebang kayu ngena kapak ba tengah utan, lalu kayu menua Lebanon ti pemadu manah deka rebah!