Read Iban Isaiah 11 Bible Online

Isaiah 11 - Iban bible

Isaiah 11

¹ Peturun Raja David nya baka kayu ti udah ditebang. Tang baka dan ti nelesak ari tuga, baka nya meh raja ke baru nya deka angkat ari peturun David.

²Roh TUHAN deka meri iya penemu-dalam, penemu enggau pengelandik kena merintah bala nembiak iya. Iya deka nemu peneka TUHAN, lalu deka ngemesaika TUHAN,

³sereta deka lantang ati nangika Iya. Iya enda ngakim beduduk ba utai ti dipeda iya, tauka ba utai ti ditusui orang ngagai iya.

⁴ Iya deka ngakim orang ke seranta ngena atur ti lurus, lalu nyaga hak orang ke nadai daya. Lebuh iya bejaku, orang deka diukum, lalu orang ke jai deka mati.

⁵ Iya deka merintah bala nembiak iya ngena atur ti lurus enggau ati ti rentang.

⁶ Ukui kampung enggau bedus deka diau begulai enggau pangan diri, lalu engkuli deka gali begulai enggau bala anak kambin. Anak sapi enggau anak singa deka begulai makai [20] lalu bala anak mit deka ngibun sida.

⁷Indu sapi enggau beruang deka begulai makai, lalu anak sapi enggau anak beruang deka gali begulai. Singa deka ngulam rumput baka sapi.

⁸Indah anak mit deh enda bebadi enti iya bemain semak ular ti bisa.

⁹ Ba Sion, Bukit Allah Taala ti kudus, nadai utai ti jai dia, lalu nadai utai ti tau ngasuh bebadi. Dunya deka penuh laban penemu TUHAN baka ai ti ngemenuhka tasik.

¹⁰ Hari deka datai alai raja ti baru ari peturun Raja David, deka nyadi menira ke mayuh bengkah bansa. Sida deka begempuru ba nengeri diraja, lalu meri basa ngagai raja nya.

¹¹Ba hari nya ila, TUHAN deka sekali agi ngena kuasa Iya, lalu mai bala nembiak Iya pulai baru ari Asiria enggau ari menua Ejip, ari menua Patros, Etiopia, Elam, Babilon, enggau Hamat, enggau ari menua ti ba tebing tasik, enggau ari mayuh bengkah menua ti ba tebing tasik.

¹²TUHAN deka nuatka siti menira kena Iya madahka ngagai semua bansa pasal Iya ti deka ngempuruka orang Israel enggau orang Judah ti udah diau ngachir ba sebelah empat iti sukut dunya, lalu mai sida pulai baru.

¹³Perintah menua Israel enda agi kepapaska perintah menua Judah, lalu menua Judah enda agi bemunsuh enggau menua Israel.

¹⁴Tang sida deka nyerang Pilistin di barat, lalu beserakup ngerumpak orang ke diau di timur. Sida deka ngalahka orang Edom enggau Moap, lalu orang Amon deka ngasika sida.

¹⁵ TUHAN deka ngerangkaika Teluk Suez, lalu Iya deka ngasuh ribut ti angat ngerangkaika Sungai Eupratis, tang ninggalka semina tujuh iti sungai ti mit, ngambika orang mayuh ulih bejalai meraka ke seberai.

¹⁶Jalai raya deka digaga ari Asiria ke orang Israel ti agi idup di menua nya, baka jalai raya ti ditengah bala aki ini sida lebuh sida angkat ari menua Ejip.