Read Iban Isaiah 13 Bible Online

Isaiah 13 - Iban bible

Isaiah 13

¹ Tu pesan pasal Babilon ti udah diterima Isaiah anak Amos ari Allah Taala.

²Tuatka menira perang ba tuchung bukit ti ngalan nadai babas! Kangauka bala soldadu, lalu kedarka lengan nuan nyadika tanda kena ngasuh sida nyerang pintu nengeri ti sumbung nya.

³TUHAN udah ngangauka bala soldadu ti udah dipilih Iya, ke temegah sereta kempang ati, ngasuh sida nyerang lalu ngukum orang ke dikeringatka Iya.

⁴Pendingka utai ti inggar rachuh ba bukit - munyi bala orang, munyi mayuh bengkah bansa enggau mayuh bengkah perintah begempuru. TUHAN benung nyendiaka bala soldadu Iya beperang.

⁵Sida datai ari menua ti jauh ba tisi langit. TUHAN ringat lalu deka ngerusak semua menua tu.

⁶ Awakka kita mengkakai natka diri pedis, laban hari TUHAN nyau semak, alai Iya ti Pemadu Bekuasa deka ngerusak.

⁷Semua orang deka lembut tulang, lalu semua orang nadai agi berani.

⁸Semua sida deka balat takut, lalu enda ulih natka diri ke pedis, baka indu ke radai deka beranak. Sida deka takut lalu beperening ngagai pangan diri, lalu mua sida deka mirah laban malu.

⁹Hari TUHAN deka datai - hari ti jai nya, alai Iya ti deka balat ringat pedis ati. Dunya deka nyadi menua puang, lalu semua orang ke bedosa deka dirusak magang.

¹⁰ Genap igi bintang, enggau genap iti genturung bintang deka badu agi manchar, mata hari deka petang lebuh iya niki, lalu bulan nadai meri penampak.

¹¹Ku TUHAN bejaku, “Aku deka ngasuh penusah ti besai datai ngagai dunya, lalu ngukum semua orang ke jai ketegal dosa sida. Aku deka ngemaruhka semua orang ke sumbung, lalu ngukum genap iku orang ke tinggi ati sereta jai enggau orang.

¹²Sida ke agi idup deka jarang agi ari emas.

¹³Aku deka ngasuh langit begetar, lalu dunya deka digusak lalu dikinsitka ari endur iya lebuh Aku, TUHAN ti Pemadu Bekuasa, ngayanka pengeringat Aku.

¹⁴“Orang bansa bukai ti diau di Babilon deka rari ngagai menua diri, pambar baka raban rusa ti ngerarika diri ari orang ke ngasu, baka bedus ti nadai orang ngibun.

¹⁵Barang sapa kena tangkap, deka direjang datai ke mati.

¹⁶Lebuh sida benung genung-genung nadai daya agi, anak mit sida deka dipalu datai ke mati. Rumah sida deka dirumpak, lalu bini sida deka dipasung.”

¹⁷Ku TUHAN bejaku, “Aku benung nyungkak orang Mede[21] nyerang Babilon. Sida enda ulih diumpan makai suap ngena pirak lalu enda ulih diuji ngena emas.

¹⁸Sida deka munuh orang ke bujang ngena panah enggau laja sida. Sida nadai ngayanka pengasih ngagai anak mit, lalu enda sinu ati ke bala sida ke nembiak.

¹⁹ Menua Babilon nya menua ti pemadu manah, lalu orang dia bela temegahka iya. Tang Aku, ti TUHAN, deka ngalahka Babilon, baka Aku ti ngalahka Sodom enggau Gomorah!

²⁰Nadai orang deka diau dia agi. Nadai orang Arab ke bejalai segau-segau, deka nirika langkau kain sida dia, lalu nadai pengibun bedus deka ngasuh raban bedus sida ngulam dia.

²¹ Nengeri nya deka nyadi endur alai jelu diau, alai burung puk ngaga tansang. Burung unta deka diau dia, lalu kambin babas deka jengkak-jengkak bejalai nengah tembawai nya.

²²Menara enggau istana deka ninga munyi auh nyawa jelu ti nyengkubang enggau jelu pasun. Maya Babilon udah datai! Timpuh iya nyau deka abis.”