Read Iban Isaiah 14 Bible Online

Isaiah 14 - Iban bible

Isaiah 14

¹TUHAN deka sekali agi kasihka bala nembiak Iya Israel, lalu milih sida ke Iya Empu. Iya deka ngasuh sida idup di menua sida empu baru, lalu orang bansa bukai deka datai lalu diau dia enggau sida.

²Mayuh bengkah bansa deka nulung orang Israel pulai ngagai menua ti udah diberi TUHAN, lalu sida deka bekereja nyadi ulun orang Israel. Sida ke udah nangkap orang Israel dulu menya, diatu deka ditangkap orang Israel, lalu orang Israel deka merintah orang ke udah nekanka pengidup sida dulu menya.

³TUHAN deka muai pemedis enggau pemerinsa ari orang Israel, lalu ngasuh sida badu agi dipejalka ngereja pengawa ti berat.

⁴Lebuh TUHAN ngereja nya, orang Israel enda tau enda ngeleseka raja menua Babilon munyi tu: “Raja ti jai udah alah! Iya enda agi ulih nekanka pengidup orang!

⁵TUHAN udah muai kuasa raja ti jai

⁶ke ringat lalu nekanka pengidup mayuh bengkah bansa, lalu enda nemu badu merinsaka bansa ti udah dialahka sida.

⁷Diatu semua dunya diau jenuh nadai utai ngachau, lalu semua orang belagu gaga ati.

⁸Kayu saipris, enggau kayu sidar di menua Lebanon rami gaga ke raja nya ti udah alah, laban orang nadai agi nebang sida, laban raja nya nyau nadai agi!

⁹“Dunya pemati sedia deka ngelaluka penatai raja menua Babilon. Semengat sida ke udah bekuasa di dunya tu, nyau begau. Semengat sida raja nyau angkat ari kerusi diraja sida.

¹⁰Semua sida ngangauka raja menua Babilon, ‘Diatu nuan nyau lemi baka kami! Nuan diatu nyadi raban kami!

¹¹Nuan udah selalu dikemesaika ngena belikan, tang diatu nuan diau di dunya pemati. Nuan gali malai tekang ulat, lalu belut nyadika pua nuan.’ ”

¹² Raja menua Babilon, nuan bintang pagi ti terang, naka meh pemalat nuan udah labuh ari langit! Dulu menya nuan udah ngalahka semua bansa bukai, tang diatu nuan udah dibuai ke tanah.

¹³ Nuan keran deka niki ke langit, lalu nudukka kerusi diraja nuan ari atas bintang ti pemadu tinggi. Nuan ngumbai diri deka duduk baka raja ba bukit ti di utara ba endur alai bala petara begempuru.

¹⁴Nuan madahka diri deka niki ngagai punchak mua hari lalu nyadi sebaka enggau Allah Taala ti Pemadu Bekuasa.

¹⁵Tang nuan udah dibuai ngagai endur ti pemadu dalam di dunya pemati.

¹⁶Orang ke udah mati deka betegenung sereta rangap-rangap meda nuan. Sida deka nanya, “Ukai enda tu orang ke udah ngusak dunya, lalu ngasuh semua perintah begetar?

¹⁷Ukai enda tu orang ke udah ngerusak semua nengeri, lalu ngaga dunya nyadi menua puang? Ukai enda tu orang ke nadai kala ngelepaska orang tangkap iya, lalu nadai kala ngasuh sida pulai ngagai menua sida empu?”

¹⁸Semua raja dunya tu bela gali dalam lumbung sida ke manah gaya,

¹⁹tang nuan nadai lumbung, lalu bangkai nuan dibuai ke luar lalu ditejuka but. Bangkai nuan dilamun bangkai bala soldadu ti udah mati beperang, dibuai sama enggau sida ngagai lubang batu, lalu dilunjak.

²⁰Laban nuan udah ngerusak menua nuan empu, lalu udah munuh orang ari bansa nuan empu, nuan enda dikuburka baka raja bukai. Nadai siku ari kita sebilik deka mengkang idup.

²¹Awakka pengawa bebunuh belabuh! Bala anak lelaki raja tu deka mati ketegal dosa aki ini sida. Nadai siku sida deka merintah dunya, tauka begagaka nengeri di serata dunya.

²²Ku TUHAN ti Pemadu Bekuasa bejaku, “Aku deka nyerang Babilon, lalu ngerusak iya. Aku deka munaska semua utai dia. Indah anak mit deh abis Aku bunuh. Aku ti TUHAN, udah bejaku.

²³Aku deka ngaga Babilon nyadi paya, lalu burung puk deka diau dia. Aku deka nyapu Babilon ngena penyapu, lalu muai semua utai dia. Aku TUHAN ti Pemadu Bekuasa, udah bejaku.”

²⁴ TUHAN ti Pemadu Bekuasa udah besumpah munyi tu: “Utai ti udah diperambu Aku, deka nyadi. Utai ti deka dikereja Aku, deka dikereja.

²⁵Aku deka ngerusak orang Asiria di menua Aku Israel, lalu ngelunjak sida ba bukit Aku. Aku deka ngelepaska bala nembiak Aku ari kungkung orang Asiria, enggau ari ma ti berat ti dibai sida.

²⁶Tu meh pelan Aku deka dunya, lalu lengan Aku dikedarka Aku kena ngukum mayuh bengkah bansa.”

²⁷TUHAN ti Pemadu Bekuasa endang mutus ati deka ngereja utai tu. Iya udah ngedarka lengan Iya sedia deka ngukum, lalu nadai orang ulih nagang Iya.

²⁸ Tu pesan ti udah dipadahka dalam taun pemati Raja Ahas.

²⁹ Kita orang Pilistin, tungkat ti dikena malu kita udah patah, tang kita nadai kebuah gaga ati, laban lebuh siku ular mati, siku ti jai agi deka datai nganti iya, lalu sigi telu ular deka mechah lalu mansutka siku naga ti terebai.

³⁰TUHAN deka nyadi pengibun ke bala nembiak Iya ke seranta, lalu Iya deka ngasuh sida diau likun. Tang Iya deka ngasuh lapar pungkang ninggang kita orang Pilistin, lalu nadai siku kita deka idup.

³¹Nyabak lalu ngangau minta tulung meh semua kita nengeri orang Pilistin! Awakka semua kita takut magang! Laban sebun abus datai ari utara, iya nya bala soldadu ti nadai takut siku.

³²Baka ni ku jalai kitai nyaut bala orang ke mai pesan ngagai kitai ari Pilistin? Kitai deka madahka ngagai sida, TUHAN udah nudukka Sion, lalu bala nembiak Iya ke merinsa, deka tetemuka pengelikun dia.