Read Iban Isaiah 15 Bible Online

Isaiah 15 - Iban bible

Isaiah 15

¹ Tu pesan pasal Moap. Nengeri Ar enggau nengeri Kir dirusak dalam semalam aja, lalu menua Moap sunyi.

²Orang di Dibon[22] deka niki ngagai bukit lalu nyabak ba endur alai nyembah engkeramba. Orang Moap nyau bekeduie nyabak, tusah ati ke nengeri Nebo enggau nengeri Medeba. Sida udah ngukur pala enggau ragum sida, laban tusah ati.

³Orang ke ba jalai raya begari ngena kain guni. Orang ngulit sereta nyabak ba padang nengeri enggau ba perabung rumah.

⁴Orang di Hesbon enggau di Elealeh nyabak, lalu sabak sida ulih didinga ari Jahas. Indah bala soldadu deh nyau getar-getar. Sida nyau nadai pemerani agi.

⁵Aku nyabakka Moap! Bala orang mayuh udah rari ngagai nengeri Soar, enggau ngagai Eglat Selisiah. Sekeda sida niti jalai ngagai Luhit, nyabak lebuh sida bejalai. Sekeda rari ngagai Horonaim, nyabak enggau naka penginggar.

⁶Sungai Nimrim nyau rangkai. Rumput ba tebing sungai nya udah layu, lalu nadai utai ti gadung agi tinggal.

⁷Orang meraka Emperan Willow, nguji rari mai semua reta tengkira sida.

⁸Di semua endur ba garis entara menua Moap, sabak nyau belauh didinga. Sabak nya didinga ba nengeri Eglaim enggau nengeri Berelim.

⁹Di nengeri Dibon, sungai nyau mirah laban darah, lalu Allah Taala bisi utai ti jai agi ari nya digalau ke orang ke diau di nengeri nya. Sigi amat, semua orang ke agi tinggal di Moap deka dibunuh magang.