Read Iban Isaiah 16 Bible Online

Isaiah 16 - Iban bible

Isaiah 16

¹Ari nengeri Sela ti di menua puang, orang Moap ngirumka siku anak bedus nyadika pemeri ngagai orang siku ke merintah di Jerusalem.

²Sida nganti ba tebing Sungai Arnon, lalu bejalai kia-kia enggau nadai meruan tuju, baka burung ti diburu ari tansang.

³Ku sida bejaku enggau orang Judah, “Padahka ngagai kami utai ti patut dikereja kami. Lindung kami baka kayu ti ngelindung mensia ari mata hari lebuh tengah hari, lalu awakka kami belelak dilindung nuan. Kami tu orang ke tasah. Lalaika kami ngambika orang nadai nemu kami.

⁴Awakka kami diau di menua kita. Jaga kami ari orang ke deka ngerusak kami.” (Pemerinsa enggau pengerusak deka badu agi nyadi, lalu orang ke ngerusak menua tu deka abis.

⁵Udah nya siku ari peturun David deka nyadi raja, lalu iya deka merintah bala nembiak iya ngena ati ti tetap enggau pengerindu. Iya deka jampat ngereja utai ti ngena, lalu iya deka meri atur ti lurus.)

⁶Ku orang Judah bejaku, “Kami udah ninga pasal penyumbung orang Moap. Kami nemu sida endang tinggi ati sereta sumbung, tang sida semina temegah ngapa.”

⁷Orang Moap deka nyabak laban penusah ti deka ditatka sida. Semua sida deka nyabak lebuh sida ingatka pemakai ti manah ti udah diempa sida di nengeri Kir-heseret. Ati sida deka tusah.

⁸Umai semak Hesbon enggau kebun anggur di Sibmah deka dirusak - kebun anggur ti mansutka wain ti dikena ngasuh bala pemerintah ke mayuh bengkah bansa mabuk. Dulu menya batang anggur nya udah nyerangkap nyentuk ngagai nengeri Jaser, enggau ke timur ngagai menua puang, ke barat ngagai tebing seberai Tasik Mati.

⁹Diatu aku nyabakka pun anggur Sibmah lebuh aku nyabakka Jaser. Ai mata aku bekeberai ke Hesbon enggau Elealeh, laban nadai utai ulih diketau kena ngelantangka ati orang mayuh.

¹⁰Nadai orang lantang ati diatu ba umai ti ami. Orang pen nadai mega manjung tauka belagu ba kebun anggur, lalu orang pen nadai mega mitan buah anggur lalu ngaga wain. Panjung gaga ati nyau nadai agi.[23]

¹¹Aku bedemuh tusah ati ke Moap, tusah ati ke Kir-heseret.

¹²Orang Moap ngelelakka diri ngapa mansang ngagai bukit alai sida ke nyembah engkeramba, enggau mansang besampi ba rumah sembiang sida, tang pengawa nya nadai mai penguntung ngagai sida.

¹³Nya meh pesan ti udah diberi TUHAN dulu ari nya pasal Moap.

¹⁴Nya alai diatu TUHAN bejaku, “Tiga taun ari diatu, pengaya menua Moap deka lesap. Ari pemayuh orang ke diau dia, ka semina dua tiga iku aja agi idup, lalu sida nya orang ke lemi.”