Read Iban Isaiah 17 Bible Online

Isaiah 17 - Iban bible

Isaiah 17

¹ Ku TUHAN bejaku, “Damaskus deka badu agi nyadi nengeri. Iya semina deka nyadi tembawai.

²Semua nengeri di menua Siria nadai agi orang nguan belama iya.[24] Semua nengeri nya deka nyadi padang rumput alai jelu bedus enggau jelu sapi ngulam, lalu nadai orang deka muru sida.

³Israel enda ulih nyaga diri, lalu Damaskus nadai agi kuasa merintah diri. Orang Siria ti agi idup deka dipechat baka orang Israel. Aku TUHAN ti Pemadu Bekuasa udah bejaku.”

⁴Ku TUHAN bejaku, “Maya deka datai alai Israel nadai agi dikemesaika, lalu pengaya iya deka diganti enggau penyeranta.

⁵Israel deka nyadi baka tanah umai alai gandum ti udah abis diketau, puang nadai utai nguan baka tanah ti ba Lebak Repaim, lebuh utai dia udah abis digumpul.

⁶Ka semina dua tiga iku aja orang agi idup, lalu menua Israel deka nyadi baka kayu kana ti udah abis diambi buah, kelimpah ari dua tiga igi ti ba puchuk, tauka dua tiga igi ti tinggal ba dan ti baruh. Aku ti TUHAN Allah Taala ke disembah orang Israel, udah bejaku.”

⁷Lebuh maya nya ila, orang deka nguing ngagai Allah Taala ke udah ngaga sida, Allah Taala ke disembah orang Israel ti kudus.

⁸Sida enda agi manggaika pengarap sida ba alta ti digaga jari sida empu, tauka manggaika pengarap sida ba engkeramba petara indu Aserah enggau alta alai nunu menyan.

⁹Lebuh maya nya ila, nengeri ti chukup dijaga deka ditinggalka mensia, baka nengeri [25] ti ditinggalka orang Ibi enggau orang Amor lebuh sida rari ari orang Israel.

¹⁰Israel, kita enda ingatka Allah Taala ti udah ngelepaska kita, sereta nyaga kita baka batu ti besai. Tang kita numbuhka kebun ke petara kita[26] alai kita nyembah petara orang bansa bukai.

¹¹Tang enti sema sida bekantuk lalu bebungai sama pagi kita ke nanam sida, kita deka mengkang nadai utai diketau. Kita semina bisi penusah lalu tubuh kita pedis sereta enda ulih gerai.

¹²Bansa ti kering begau munyi auh tasik, munyi segum pangka gelumbang.

¹³Semua bansa nyerang baka alun gelumbang, tang Allah Taala ngerara sida, lalu sida nyurutka diri, dikebuka baka amau ti ba tisi bukit, baka rumput ti rangkai ti ditabanka ribut puting beliung.

¹⁴Lebuh lemai hari, sida ngasuh orang balat takut, tang lebuh pagi hari sida nadai agi. Nya meh gaya pengujung genap iku orang ke ngerumpak menua kitai.