Read Iban Isaiah 18 Bible Online

Isaiah 18 - Iban bible

Isaiah 18

¹ Ngilah mayuh bengkah sungai di menua Etiopia bisi siti menua alai munyi kebap sayap didinga.

²Ari menua nya datai bala pengari bansa. Sida undur ngilika Sungai Nile ngena perau ti digaga ari papairus. Pulai ke rumah, kita seruan ti deras! Bai pesan ngagai menua kita ke mayuh sungai, ngagai bansa kita ke kering sereta bekuasa, ngagai bala kita ke tinggi sereta alus kulit, ke diketakutka orang di serata dunya.

³Anang enda mending, genap iku kita ke diau di dunya! Giga siti menira ti deka dituatka ba tuchung bukit! Pendingka munyi terumpit!

⁴Ku TUHAN bejaku ngagai aku, “Aku deka nilik ari serega enda bemunyi baka ambun ti datai lebuh malam ti angat, lebuh maya ngetau, terang baka panchar mata panas lebuh siang hari.

⁵Sebedau buah anggur diketau, lebuh semua bungai udah labuh magang, lalu buah anggur benung mansau, munsuh deka ngerusak orang Etiopia ngemudah duku ti nyarau dan anggur.

⁶Bangkai bala soldadu sida enda dikuburka ngambika sida diempa burung enggau jelu babas. Lebuh musin panas, burung deka makai sida, lalu lebuh musin chelap, jelu babas deka makai sida.”

⁷Maya deka datai alai TUHAN ti Pemadu Bekuasa deka nerima piring ari menua ti mayuh sungai, menua ti kering sereta bekuasa, bansa orang ke tinggi sereta alus kulit, ke diketakutka orang di serata dunya. Sida deka datai ngagai Bukit Sion, alai TUHAN ti Pemadu Bekuasa disembah.