Read Iban Isaiah 19 Bible Online

Isaiah 19 - Iban bible

Isaiah 19

¹ Tu pesan pasal Ejip. TUHAN deka datai ngagai menua Ejip, nepan mua hari ti deras. Engkeramba orang Ejip getar-getar di mua Iya, lalu orang Ejip nadai berani agi.

²Ku TUHAN bejaku, “Aku deka nyungkak orang Ejip beperang ngelaban diri sebansa, menyadi ngelaban menyadi, pangan ngelaban pangan, nengeri ngelaban nengeri, lalu bala raja deka berebutka kuasa.

³Aku deka ngemuntanka pelan orang Ejip, lalu ngasuh sida lemi semengat. Sida deka minta tulung ari engkeramba sida, lalu sida deka betanya ngagai orang ke tau tujum enggau ngagai semengat orang ke udah mati.

⁴Aku deka nyerahka orang Ejip ngagai raja ti jai, ti deka merintah sida. Aku TUHAN ti Pemadu Bekuasa udah bejaku.”

⁵Ai Sungai Nile deka surut, lalu sungai nya deka mupuk rangkai.

⁶Semua arus sungai deka bebau but lebuh sungai nya majak rangkai. Temesing enggau bundung deka layu,

⁷lalu semua utai ti ditanam nisi tebing Sungai Nile, deka rangkai, lalu dikebuka ribut.

⁸Genap iku orang ke berikan ba Sungai Nile deka bedemuh lalu nyabak. Ginti enggau jala sida nadai guna agi.

⁹Sida ke ngaga kain linin deka tusah ati.

¹⁰Orang ke betenun enggau orang ke landik gawa deka tusah ati lalu merampau diau.

¹¹Bala tuai nengeri Zoan endang beli! Orang Ejip ke pemadu bepenemu-dalam meri jaku lalau ti beli! Baka ni ku sida berani bejaku enggau raja madahka diri ngambi endur ari orang ke bepelajar enggau bala raja ti dulu kelia?

¹²Raja menua Ejip, dini alai bala penyanding penemu nuan ti pandai? Kada enda sida ulih madahka ngagai nuan pelan ti diungkupka TUHAN ti Pemadu Bekuasa ke menua Ejip.

¹³Bala tuai Zoan enggau Mempis endang beli. Sida dikarapka nguluka bansa, tang sida udah nesatka bansa.

¹⁴TUHAN udah nyungkak sida meri jaku lalau ti nyarutka runding. Ketegal nya, semua utai ti dikereja menua Ejip salah magang, lalu iya bejalai guir-guir baka orang ke mabuk, ke tekelinchir ba mutah diri empu.

¹⁵Nadai orang di menua Ejip, kaya tauka seranta, tinggi pangkat tauka enda ditemu orang, ulih nulung.

¹⁶Maya deka datai alai orang Ejip deka takut baka orang ke indu. Sida deka getar-getar takut lebuh sida meda TUHAN ti Pemadu Bekuasa ngedarka jari Iya, deka ngukum sida.

¹⁷Orang menua Ejip deka balat takutka menua Judah genap kali sida ingatka ukum ti udah disediaka TUHAN ti Pemadu Bekuasa ke sida.

¹⁸Lebuh maya nya ila, jaku orang Hebrew deka dikena dalam lima buah nengeri menua Ejip. Orang dia deka besumpah dalam nama TUHAN ti Pemadu Bekuasa. Sebuah ari nengeri nya deka dikumbai, “Nengeri Mata Hari.”

¹⁹Lebuh maya nya ila, sebuah alta deka digagaka TUHAN di menua Ejip, enggau siti tiang batu ti besai ti diserahka ngagai Iya ba garis entara menua Ejip.

²⁰Utai nya deka nandaka TUHAN ti Pemadu Bekuasa bisi di menua Ejip. Lebuh pengidup orang mayuh dia ditekanka, lalu sida ngangauka TUHAN minta Iya nulung sida, Iya deka ngasuh siku orang ngelepaska sida.

²¹TUHAN deka mandangka Diri Empu ngagai orang Ejip. Udah nya baru sida deka ngaku sereta nyembah Iya, lalu mai piring enggau genselan ngagai Iya. Sida deka besemaya enggau Iya ngena sumpah, lalu deka ngereja utai ti disemaya sida.

²²TUHAN deka ngukum orang Ejip, tang udah nya Iya deka ngeraika sida. Sida deka nguingka diri ngagai Iya, lalu Iya deka ninga sampi sida, lalu ngeraika sida.

²³Lebuh maya nya ila, jalai raya deka digaga ari Ejip ngagai Asiria. Orang ari menua dua bengkah nya deka bejalai kundang-kasang entara dua buah menua nya, lalu bansa dua bengkah nya deka nyembah begulai.

²⁴Lebuh maya nya ila, menua Israel deka sebaka enggau menua Ejip enggau menua Asiria, lalu bansa tiga bengkah nya deka mai berekat ngagai semua dunya.

²⁵TUHAN ti Pemadu Bekuasa deka merekatka sida, lalu bejaku, “Aku deka merekatka nuan, Ejip, ti nembiak Aku. Nuan Asiria, ti udah digaga Aku, lalu nuan Israel, bansa ti dipilih Aku.”