Read Iban Isaiah 2 Bible Online

Isaiah 2 - Iban bible

Isaiah 2

¹Tu pesan ti udah diberi Allah Taala ngagai Isaiah anak Amos pasal menua Judah enggau Jerusalem:

²Jemah ila bukit ti alai Rumah Sembiang bediri deka nyadi bukit ti pemadu tinggi lalu ngayung semua bukit ti bukai. Semua bansa deka beterudus datai ngagai iya,

³lalu sida deka bejaku, “Aram kitai niki ngagai bukit TUHAN,[4] ngagai Rumah Sembiang Allah Taala ke disembah orang Israel. ngambika Iya ngajar kitai pasal utai ti deka dikereja kitai. Kitai deka bejalai nengah jalai ti udah dipilih Iya, laban ajar ti diberi TUHAN datai ari Jerusalem. Iya bejaku ari Sion ngagai bala nembiak Iya.”

⁴ Iya deka mutarka laya entara mayuh bengkah bansa ti besai. Sida deka nempa pedang sida nyadi pengeradu tanah lalu sangkuh sida nyadi duku kena nyarau kayu. Semua bansa deka badu agi beperang, nadai agi nyendiaka diri beperang.

⁵O peturun Jakop, aram kitai bejalai dalam penampak ti udah diberi TUHAN ngagai kitai!

⁶O Allah Taala, Nuan udah ninggalka bala nembiak Nuan, iya nya bala peturun Jakop! Menua tu nyau penuh laban pengawa keramat ti datai ari Timur enggau ari menua Pilistin.[5] Bala nembiak Aku nyau nitihka adat asal orang bansa bukai.

⁷Menua sida nyau penuh laban pirak enggau emas, lalu pengaya sida nadai besekat. Menua sida penuh laban kuda, lalu pemayuh kerita perang sida nyau nadai besekat.

⁸Menua sida penuh laban engkeramba, lalu sida besembahka utai ti udah digaga jari sida empu.

⁹Genap iku orang deka dikemaruhka sereta dipechat. Anang ngampun sida, TUHAN!

¹⁰ Sida deka belalai dalam lubang gua ba bukit ti bebatu, tauka numbak lubang ba tanah nguji ngerarika diri ari pengeringat TUHAN, lalu belalai ari kuasa enggau mulia Iya!

¹¹Maya deka datai alai penyumbung mensia deka abis, lalu ati sida ke tinggi deka dirusak. Nya baru semina TUHAN siku aja deka ditinggika.

¹²Ba hari nya TUHAN ti Pemadu Bekuasa deka ngemaruhka genap iku mensia ti bekuasa, semua orang ke sumbung, enggau orang ke ngemesaika diri.

¹³Iya deka ngerusak kayu sidar ti tinggi di menua Lebanon, enggau semua kayu oak di menua Basan.

¹⁴Iya deka ngeruntuhka bukit ti tinggi enggau munggu,

¹⁵semua menara ti tinggi, enggau dinding semua kuta.

¹⁶Iya deka ngaramka kapal ti pemadu besai sereta pemadu manah.

¹⁷Penyumbung mensia deka abis, lalu ati sida ke tinggi deka dirusak. Semua engkeramba deka lesap, lalu semina TUHAN siku aja deka ditinggika ba hari nya.

¹⁹Orang deka belalai dalam lubang gua ba sebelah bukit ti bebatu, tauka numbak lubang ba tanah, nguji ngerarika diri ari pengeringat TUHAN, lalu ngelalaika diri ari kuasa enggau mulia Iya, lebuh Iya datai ngusak dunya.

²⁰Lebuh hari nya datai, sida deka muai emas enggau pirak ti dikembuan sida, enggau engkeramba ti udah digaga sida, lalu ninggalka utai nya ke jelu chuik enggau kusing.

²¹Lebuh TUHAN datai ngusak dunya, orang deka belalai dalam lubang, enggau dalam gua ba sebelah bukit ti bebatu, nguji ngerarika diri ari pengeringat Iya, lalu belalai ari kuasa enggau mulia Iya.

²²Anang agi ngarapka mensia. Sida nadai rega.