Read Iban Isaiah 20 Bible Online

Isaiah 20 - Iban bible

Isaiah 20

¹Nitihka atur Raja Besai Sargon menua Asiria, tuai soldadu orang Asiria nyerang nengeri orang Pilistin ti dikumbai Asdot.

²Tiga taun dulu ari nya, TUHAN udah ngasuh Isaiah anak Amos muka kasut iya enggau kain guni ti dikena iya begari. Isaiah ngasika TUHAN lalu bejalai telanjai, sereta enda bekasut.

³Lebuh Asdot udah alah, TUHAN lalu bejaku, “Nembiak Aku Isaiah udah bejalai telanjai sereta enda bekasut tiga taun. Tu nyadika tanda ke utai ti deka nyadi ngagai menua Ejip enggau menua Etiopia.

⁴Raja besai menua Asiria deka nabanka bala orang tangkap ari menua dua bengkah nya, lalu sida deka ditabanka telanjai. Sida ke tuai, enggau sida ke biak deka bejalai enda bekasut sereta telanjai, ayan jumbal burit kena ngemaluka menua Ejip.

⁵Sida ke udah ngarapka Etiopia nyaga sida, lalu udah temegah bejakuka pasal menua Ejip, deka asa ngapa, lalu nadai agi pengadang.

⁶Lebuh maya nya ila, orang ke diau ba tebing tasik di menua Pilistin deka nyebut, ‘Peda utai ti udah nyadi ba orang ke dikarapka kitai nyaga kitai ari raja menua Asiria! Baka ni ku kitai ulih idup?’ ”