Read Iban Isaiah 21 Bible Online

Isaiah 21 - Iban bible

Isaiah 21

¹Tu pesan pasal menua Babilon. Baka ribut puting beliung ti mangka ari menua puang, baka nya meh penusah ti besai deka datai ari menua ti balat ngenakut.

²Aku bisi meda siti genera pasal utai ti nyadi, ti balat ngenakutka ati, genera pasal pengawa ti bejualka bansa enggau pasal pengerusak. Kita bala soldadu Elam, serang meh bala sida nya! Bala soldadu Media, kelulung meh semua nengeri! Allah Taala deka ngemuntanka semua pengawa Babilon ti merinsaka orang.

³Utai ti dipeda enggau didinga aku dalam genera nya udah balat ngasuh aku takut sereta pedis, pedis baka indu ke radai deka beranak.

⁴Ati aku balat amat rawan, lalu aku getar-getar takut. Aku lama udah nganti hari lemai, tang lebuh hari nyau lemai, balat agi ga aku takut.

⁵Dalam genera nya, siti pengerami makai besai bisi disediaka. Tikai udah dianchau alai bala pengabang duduk. Sida makai ngirup. Tekala nya jaku ti inggar bisi didinga: “Kita ke tuai soldadu! Sediaka terabai kita!”

⁶Udah nya TUHAN lalu bejaku ngagai aku, “Alai nuan ngasuh orang siku bediri nyadi jejaga, lalu asuh iya madahka utai ti dipeda iya.

⁷Enti iya bisi tepedaka bala orang ke nepan kuda datai begandin dua, enggau orang ke nepan keledai enggau jelu unta, iya enda tau enda nengkilaka sida.”

⁸Orang jejaga nya lalu ngangau, “Tuan, aku udah bediri jaga ditu siang malam.”

⁹ Bala orang ke nepan kuda begandin dua lalu datai enggau ngenyit. Jejaga nya lalu madahka berita nya, “Babilon udah alah! Semua engkeramba ti disembah sida nyau abis redak ba tanah.”

¹⁰Nembiak Aku Israel, kita udah ditungku baka gandum, tang diatu aku udah madahka ngagai kita berita manah ti udah didinga aku ari TUHAN ti Pemadu Bekuasa, ti Allah Taala ke disembah orang Israel.

¹¹Tu pesan pasal Edom. Siku orang ari Edom bisi ngangauka aku, “Jejaga, ni pengelama baru malam tu apus? Padahka ngagai aku, kemaya malam tu apus.”

¹²Ku aku nyaut, “Hari nyau deka tawas, tang hari deka malam baru. Enti nuan deka nanya baru, pulai kitu baru, lalu tanya.”

¹³Tu pesan pasal menua Arabia. Kita orang di Dedan ke bepalan ba menua puang di Arabia,

¹⁴beri ai ngagai orang ke aus, ke datai ngagai kita. Kita orang ari menua Tema, beri pemakai ngagai orang ke tasah.

¹⁵Orang ngerarika diri ari pedang ti sedia deka munuh sida, ari panah ti sedia deka nimbak sida, ari semua penusah ti nuntung lebuh maya beperang.

¹⁶Udah nya TUHAN lalu bejaku ngagai aku, “Dalam setaun da agi, kuasa raban bansa Kedar deka abis.

¹⁷Orang ke besenyataka panah nya soldadu ti pemadu berani ari raban bansa Kedar, tang ka mimit aja bala sida deka mengkang idup. Aku ti TUHAN Allah Taala ke disembah orang Israel, udah bejaku.”