Read Iban Isaiah 22 Bible Online

Isaiah 22 - Iban bible

Isaiah 22

¹Tu pesan pasal Jerusalem. Nama utai ti nyadi dia? Nama kebuah semua orang dalam nengeri nya ngintu pengerami ba perabung rumah?

²Semua orang di nengeri nya nyau richah magang, inggar sereta gagit ati. Kita ke mati ba perang tu, kita ukai mati betempuh enggau munsuh.

³Semua tuai kita rari, lalu ditangkap, sebedau sida sempat nimbakka laja sida.

⁴Nya alai, diatu awakka aku nyabak kediri ke semua bala aku ti udah mati. Anang nguji ngaum aku.

⁵Tu meh maya orang begau abis ati, maya alah, maya charut ba Emperan Genera, lalu TUHAN ti Pemadu Bekuasa udah ngasuh utai nya nuntung kitai. Dinding kuta nengeri kitai udah runtuh, lalu orang ke minta tulung nyau bekerauh nyabak ba sebelah bukit.

⁶Bala soldadu ari menua Elam datai nepan kuda, besenyataka panah enggau laja. Bala soldadu ari menua Kir udah nyendiaka terabai sida.

⁷Emperan ti ami di menua Judah nyau penuh laban kerita perang. Bala soldadu ke nepan kuda bediri di mua pintu nengeri Jerusalem.

⁸Semua menua Judah nadai ulih dijaga agi. Lebuh utai nya nyadi menya, kita lalu mansutka senyata ari sarang senyata kita.

⁹Kita tetemuka endur alai dinding kuta Jerusalem patut diseruri baru. Kita meresa semua rumah di Jerusalem, lalu ngeruntuhka sekeda rumah nya, ngulihka batu ari rumah nya kena nyeruri dinding kuta nengeri. Kena kita nyimpan ai,

¹¹kita ngaga siti letung dalam nengeri nya, alai nyimpan ai ti rarat ari letung ti lama. Tang kita enggai mendingka Allah Taala, ke lama udah ngaga pelan ke semua utai tu, lalu udah ngasuh utai tu nyadi.

¹²Lebuh maya nya suba TUHAN ti Pemadu Bekuasa ngangauka kita, ngasuh kita nyabak sereta ngulit, ngukur pala kita, lalu begari ngena kain guni.

¹³ Tang kita ketawa lalu rami. Kita munuh lalu makai jelu bedus enggau jelu sapi, lalu kita ngirup wain. Ku kita, “Manah agi kitai makai ngirup, laban pagila kitai mati!”

¹⁴TUHAN ti Pemadu Bekuasa Empu udah bejaku ngagai aku, ku Iya, “Pengawa sida ke jai tu enda diampun, seagi-agi sida idup. Aku TUHAN ti Pemadu Bekuasa, udah bejaku.”

¹⁵TUHAN ti Pemadu Bekuasa udah ngasuh aku mansang ngagai Sebna, siku orang ke ngemataka ruang bilik raja, lalu nyebut ngagai iya,

¹⁶“Sapa nuan tu ku pikir nuan? Nama kuasa kena nuan numbak lumbung ke diri empu ba tisi bukit ti bebatu tu?

¹⁷Nuan nyangka tinggi pangkat, tang TUHAN deka nyapai nuan lalu muai nuan.

¹⁸Iya deka nyapai nuan baka buah bol, lalu nikauka nuan ngagai menua ti besai agi. Nuan deka mati dia, ngimbai kerita perang ti dikemegahka nuan. Nuan tu ngemaluka ruang bilik tuan nuan.

¹⁹TUHAN deka muai nuan ari pengawa nuan, lalu nurunka pangkat nuan.”

²⁰Ku TUHAN bejaku ngagai Sebna, “Lebuh utai nya nyadi, Aku deka mesanka nembiak Aku Eliakim anak Hilkiah.

²¹Aku deka ngerasukka baju panjai enggau belulang nuan ba iya, lalu meri ngagai iya semua kuasa nuan. Iya deka nyadi baka apai ke orang Jerusalem enggau orang Judah.

²² Aku deka meri ngagai iya semua kuasa di baruh raja ke ari peturun David. Iya deka megai kunchi opis perintah. Sebarang utai ti dibuka iya, nadai orang deka nikup, lalu sebarang utai ti ditikupka iya, nadai orang deka muka.

²³Aku deka ngentapka iya ba pengawa iya baka tiang bantil, lalu iya deka mai basa ngagai semua sida sebilik.

²⁴“Tang semua kaban belayan iya, enggau orang ke ditupi iya, deka nating iya magang. Sida deka begantung ba iya baka periuk enggau mangkuk ti begantung ari tiang bantil!

²⁵Lebuh utai nya nyadi, tiang bantil ti udah dipantang teguh, deka techabut lalu rebah. Nya meh pengujung semua utai ti udah digantung ba iya.” TUHAN udah bejaku.