Read Iban Isaiah 23 Bible Online

Isaiah 23 - Iban bible

Isaiah 23

¹ Tu pesan pasal Tire. Nyabak enggau ati ti tusah meh kita kelasi ti di tasik luar! Pengkalan kita di Tire udah dirusak. Rumah enggau pengkalan dalam nengeri nya udah nyadi tembawai. Lebuh kapal kita pulai ari Saiprus, kita deka ninga berita nya.

²Nyabak meh kita, orang dagang ari Sidon! Kita udah ngirumka pengari

³ngelayang tasik bebeli enggau bejualka gandum ti tumbuh di menua Ejip, lalu bedagang enggau semua bansa.

⁴Nuan patut nemu malu, Nengeri Sidon! Tasik enggau tasik ti dalam enggai agi bempu nuan. Ku sida, “Aku nadai kala bisi anak. Aku nadai kala nupi anak lelaki tauka anak indu.”

⁵Indah orang Ejip deh deka tekenyit sereta tusah ati lebuh sida ninga berita pasal Tire ti udah dirusak.

⁶Nyabak enggau ati ti tusah meh kita orang Ponisia! Uji kita ngerarika diri ngagai menua Spain!

⁷Kati nengeri tu amat nengeri Tire ti seruran ngelantangka diri, ti digaga dulu kelia? Kati tu nengeri ti udah ngirumka orang belayar ngelayang tasik ngambika sida netapka diri din?

⁸Sapa udah ngaga pelan deka ngasuh semua utai tu ninggang Tire, nengeri diraja, ti bempu bala orang dagang ti balat dibasa orang di dunya tu?

⁹TUHAN ti Pemadu Bekuasa udah ngaga pelan ke semua utai nya, kena Iya ngemuntanka semua penyumbung sida dalam semua utai ti udah dikereja sida, lalu kena ngemaruhka sida ke dibasa orang.

¹⁰Bumai meh kita, kita ke diau di menua Spain! Nadai orang agi bisi nyaga kita.[27]

¹¹TUHAN udah ngedarka jari Iya atas tasik, lalu udah ngalahka mayuh bengkah perintah. Iya udah ngasuh endur alai orang Ponisia bedagang dirusak.

¹²Nengeri Sidon, pengelantang nuan nadai agi, lalu bala nembiak nuan kena tekan. Enti sema sida rari ngagai Saiprus, enda meh sida ulih diau likun. (

¹³Orang Babilon, ukai orang Asiria, ti udah nejuka jelu babas ngelunjak Tire. Orang Babilon ti udah nirika menara kena ngelulung sereta ngeruntuhka kuta Tire, lalu ninggalka nengeri nya nyadi tembawai.[28])

¹⁴Nyabak enggau ati ti tusah meh kita kelasi ke belayar ba tasik luar! Nengeri ti dikarapka kita, udah dirusak.

¹⁵Maya deka datai alai Tire enda dikingatka agi dalam pengelama tujuh puluh taun, iya nya dalam kandang umur raja. Ba pengujung tujuh puluh taun nya, Tire deka nyadi baka indu sundal ke disebut dalam pantun:

¹⁶Bai meh belikan kita, lalu bejalai nengah nengeri nya, kita indu sundal ti enda dikingatka orang agi! Tebah meh musik kita lalu belagu baru ngambika kita dikingatka baru.

¹⁷Ba ujung tujuh puluh taun nya, TUHAN deka nejuka Tire pulai baru ngagai pengawa dagang iya ti lama, lalu iya deka nyundalka diri ngagai semua perintah di dunya tu.

¹⁸Duit ti ulih iya bedagang deka diserahka iya ngagai TUHAN. Iya enda nyimpan duit nya, tang orang ke nyembah TUHAN deka ngena duit nya bebelika pemakai enggau gari ti dipeguna sida.