Read Iban Isaiah 24 Bible Online

Isaiah 24 - Iban bible

Isaiah 24

¹TUHAN deka ngerusak dunya, lalu ngasuh iya puang nadai orang nguan. Iya deka musil mua dunya, lalu ngachirka semua bansa ti diau dalam iya.

²Pengujung semua orang endang sebaka magang - bala imam, enggau orang mayuh, bala ulun enggau tuan sida, orang ke bebeli enggau orang ke bejual, orang ke nyali duit enggau orang ke nginjau duit, orang ke kaya enggau ke seranta.

³Dunya deka rusak lalu redak. TUHAN udah bejaku, lalu utai nya deka nyadi.

⁴Dunya deka rangkai lalu layu. Semua dunya deka lemi. Dunya enggau langit deka buruk.

⁵Orang mayuh udah ngamahka dunya laban sida udah ngelanggar adat Allah Taala, sereta mungkir ari sempekat ti meruan belama iya.

⁶Nya alai Allah Taala udah nyumpah dunya. Orang dunya tu deka merinsa ketegal utai ti udah dikereja sida. Orang ke agi idup deka majak mimit se-mimit.

⁷Pun anggur deka layu, lalu wain nyau nadai mayuh agi. Semua orang ke udah lantang suba, diatu nyau tusah ati,

⁸lalu belikan enggau dedumbak ti dikena ngelantangka ati, nyau nadai agi ditebah.

⁹Orang nadai agi gaga ati belagu ngirup wain. Orang nadai agi ngasaika penyamai wain.

¹⁰Di nengeri nya, semua utai nyau charut magang, lalu orang mayuh ngunchi diri dalam rumah diri empu ngiga pengelikun.

¹¹Orang mayuh manjung ba sebelah jalai raya, laban wain nyau udah abis. Pengelantang udah abis belama iya, laban iya udah dibuai ari dunya.

¹²Nengeri nya nyau tembawai, lalu pintu iya udah runtuh.

¹³Tu meh utai ti deka nyadi ba genap bengkah bansa di serata dunya. Utai nya deka nyadi baka lebuh maya badu ngetau, lebuh semua buah kana udah disipat ari puchuk iya, lalu buah anggur ti pemadu dudi udah abis diketau.

¹⁴Orang ke agi idup deka belagu gaga ati. Sida ke di Barat deka nusui pasal pemesai kuasa TUHAN,

¹⁵lalu sida ke di Timur deka muji Iya. Orang ke diau ba sebelah menua ti ba tebing tasik deka muji TUHAN Allah Taala ke disembah orang Israel.

¹⁶Ari endur ti pemadu jauh di dunya tu, kitai deka ninga lagu kena muji Israel, bansa ti lurus. Tulah meh aku tu! Aku nyau majak kurus-sekurus! Orang ke nyual bansa majak bejualka bansa, lalu pengawa sida ke aum juak majak jai-sejai.

¹⁷Pendingka aku, semua kita! Utai ti balat ngenakut, lubang kebung, enggau panjuk mengkang ngipa kita.

¹⁸Barang sapa nguji ngerarika diri ari utai ti balat ngenakut, deka labuh ngagai lubang kebung, lalu barang sapa ulih ngerarika diri ari lubang kebung, deka disintak panjuk. Ujan ti bangat deka labuh ari langit, lalu pugu dunya deka beguyat.

¹⁹Tanah deka merekah belah lalu pechah.

²⁰Dunya empu deka guir-guir baka orang ke mabuk, giau-giau baka langkau ti dipangkaka kabut. Dunya nyau berat laban dosa, lalu iya deka rebah lalu enda angkat agi.

²¹Maya deka datai alai TUHAN deka ngukum kuasa ti di atas, enggau bala pemerintah ti di dunya.

²²Allah Taala deka ngempuruka bala raja baka orang jil dalam lubang kebung. Iya deka nutup sida dalam rumah jil nyentuk ngagai maya sida diukum.

²³Bulan deka nyadi petang, lalu mata hari enda manchar agi, laban TUHAN ti Pemadu Bekuasa deka nyadi raja. Iya deka merintah di Jerusalem ba Bukit Sion, lalu bala tuai orang mayuh deka meda mulia Iya.