Read Iban Isaiah 26 Bible Online

Isaiah 26 - Iban bible

Isaiah 26

¹Hari deka datai alai orang mayuh deka nyanyi lagu tu di menua Judah: Nengeri kitai kering! Allah Taala empu ke nyaga dinding kuta iya!

²Tukangka pintu nengeri ngambika bansa ti tetap ati, tama, iya nya bansa ti ngereja utai ti ngena.

³Nuan, TUHAN, meri pemaik ti pemadu menyana ngagai orang ke ngembuan juluk ati ti tegap, sereta manggaika pengarap sida ba Nuan.

⁴Panggaika pengarap kitai ba TUHAN belama iya. Iya deka seruran nyaga kitai.

⁵Iya udah ngemaruhka orang ke sumbung. Iya udah ngerusak nengeri ti tegap ti alai sida diau, lalu ngeruntuhka dinding kuta iya nyadi amau.

⁶Orang ke kena tekan, bejalai ba atas nengeri nya diatu lalu ngelunjak iya.

⁷TUHAN, Nuan ngaluska jalai ti ditengah orang ke menyana. Jalai ti ditengah sida nya rata.

⁸Kami nitihka peneka Nuan, lalu manggaika pengadang kami ba Nuan. Semina Nuan siku aja ti dikinginka kami.

⁹Lebuh malam hari aku lelengauka Nuan enggau pengabis ati aku. Lebuh Nuan ngakim dunya enggau orang ke diau dalam iya ila, semua sida deka nemu utai ti dikumbai atur ti lurus.

¹⁰Taja pen Nuan nelap enggau orang ke jai, tang sida nadai kala belajar ngereja utai ti ngena. Indah di menua ti diuan orang ke lurus tu deh sida mengkang ngereja utai ti salah. Sida enggai ngaku pemesai kuasa Nuan.

¹¹ Bala munsuh Nuan enda nemu Nuan deka ngukum sida. TUHAN, asuh sida malu, lalu awakka sida merinsa. Awakka sida natka ukum ti udah disediaka Nuan ke sida. pandangka ngagai sida pemesai pengerindu Nuan ke nembiak Nuan.

¹²Nuan deka ngasuh kami nyadi kaya-raja, TUHAN. Semua utai ti ulih kami endang utai ti dikereja Nuan ke kami.[30]

¹³TUHAN Allah Taala kami, kami udah diperintah orang bukai, tang semina Nuan siku aja ti TUHAN kami.

¹⁴Diatu sida udah mati, lalu enda idup agi. Semengat sida enda angkat agi, laban Nuan udah ngukum lalu ngerusak sida. Nadai orang agi ingatka sida.

¹⁵TUHAN, Nuan udah ngasuh bansa kami mansang, ngerembaika menua kami kia-kia, lalu utai tu udah mai basa ngagai Nuan.

¹⁶Nuan udah ngukum bala nembiak Nuan, TUHAN, lalu enggau ati ti tusah sida besampi ngagai Nuan.[31]

¹⁷Nuan, TUHAN, udah ngasuh kami duie-duie nyabak, baka indu ke radai deka beranak.

¹⁸Kami ngeliat natka diri pedis, tang kami nadai ngadaka utai. Kami nadai bulih pemenang ke menua kami. Kami nadai bulih utai.[32]

¹⁹Bala kami ke udah mati, deka idup baru! Bangkai sida deka idup baru. Semua sida ke tinduk dalam kubur deka dani lalu belagu gaga ati. Baka ambun ti bekebelik ngemasahka tanah, baka nya meh TUHAN deka ngidupka baru sida ke lama udah mati.

²⁰Pulai ngagai rumah kita empu, kita ke nembiak aku, lalu tutup pintu kita. Belalai enda lama, nganti pengeringat Allah Taala badu.

²¹TUHAN benung datai ari endur Iya ti di serega, deka ngukum orang di dunya tu ketegal dosa sida. Pengawa ti belalai bebunuhka orang deka dipandangka, lalu tanah enda agi ngelalaika bangkai orang ke udah dibunuh.