Read Iban Isaiah 27 Bible Online

Isaiah 27 - Iban bible

Isaiah 27

¹ Ba hari nya TUHAN deka ngena pedang Iya ti tajam sereta bisa, munuh ikan ti besai, iya nya naga ti ngelingkang sereta ngelingkung, lalu munuh naga[33] ti diau di tasik.

²Ba hari nya, TUHAN deka bejaku ngenang pasal pemanah kebun anggur Iya,

³“Aku ngintu iya lalu selalu manjah iya enggau ai. Aku nyaga iya siang malam, ngambika orang nadai ngerusak iya.

⁴Aku enda agi ringat ngagai kebun anggur nya. Enti sema duri enggau randau bisi dilaban, Aku deka nunu sida datai ke sida abis retung.

⁵Tang enti bala munsuh nembiak Aku minta aku ngelindung sida, awakka sida meh bebaik enggau Aku. Sigi amat, awakka sida bebaik enggau Aku.”

⁶Jemah ila orang Israel, bala peturun Jakop, deka beurat baka kayu, lalu sida deka bebungai lalu bekantuk. Dunya deka penuh laban buah sida.

⁷TUHAN nadai kala ngukum Israel ngemalat Iya ke ngukum bala munsuh sida, tauka munuh sida ngemayuh munsuh ti dibunuh Iya.

⁸TUHAN muai bala nembiak Iya ngagai menua bukai kena Iya ngukum sida. Iya nabanka sida ngena ribut ti jai ari timur.[34]

⁹Tang dosa orang Israel deka diampun semina lebuh batu alta orang kapir udah diinsarka baka kapu, lalu alta alai nunu menyan, tauka tanda petara indu Aserah udah abis dirusak.

¹⁰Nengeri ti bekuta nyau nyadi tembawai. Nengeri nya nadai mensia baka menua puang. Iya udah nyadi padang rumput ke jelu sapi, endur alai sida belelak enggau ngulam.

¹¹Dan kayu layu sereta patah, lalu sida ke indu ngumpul dan kayu nya nyadika kayu api. Laban bala nembiak TUHAN enda mereti, nya alai Iya ti udah nempa sida, enggai sinu ati ke sida, tauka kasihka sida.

¹²Ba hari nya, TUHAN deka ngempuruka bala nembiak Iya, siku-siku sekali, ari Eupratis nyentuk ngagai garis entara menua enggau menua Ejip, baka ke magi gandum ari ampa.

¹³Ba hari nya ila, siti terumpit deka disepu kena ngangauka semua orang Israel ti udah dibuai ngagai menua Asiria enggau menua Ejip ngambika sida pulai baru. Sida deka datai lalu nyembah TUHAN di Jerusalem, ba bukit Iya ti kudus.[35]