Read Iban Isaiah 28 Bible Online

Isaiah 28 - Iban bible

Isaiah 28

¹Tulah meh perintah menua Israel! Mulia ti dikemegahka iya nyau layu baka sengkilung bunga ti ba pala bala tuai ke mabuk. Pala sida bebau rengut laban minyak wangi, tang sida garing-garing mabuk.

²TUHAN udah ngasuh siku orang ke kering sereta bekuasa nyerang sida, orang ke deka datai baka ujan batu, baka ujan ti bangat, baka bah ti deras, ti deka ngampuhka menua.

³Penyumbung bala tuai bansa ke mabuk deka dilunjak.

⁴Mulia bala tuai ti sumbung nya, deka majak kurang-sekurang lalu lesap baka buah kana ti terubah, ti diambi lalu diempa lebuh sida mansau.

⁵Maya deka datai alai TUHAN ti Pemadu Bekuasa deka nyadi baka makota bungai ti bemulia, ke bala nembiak Iya ti agi idup.

⁶Iya deka meri ati ti lurus ngagai sida ke bekereja nyadi hakim, enggau pemerani ngagai sida ke nyaga pintu nengeri ari serang munsuh.

⁷Indah bala nabi enggau bala imam deh mabuk, datai ke sida nyau guir-guir bejalai. Sida udah bebendar ngirup wain enggau ai ti bisa, datai ke sida nyau charut runding sereta tesangkut. Sida nabi nya kelalu mabuk datai ke sida nyau enda nemu reti genera ti dikirumka Allah Taala, lalu bala imam kelalu mabuk datai ke sida nyau enda nemu ngatur pechara.

⁸Mija ti alai sida duduk nyau abis dibalut mutah. Nadai siti endur ba mija nya ti beresi.

⁹Sida mutap pasal aku. Ku sida, “Ngajar sapa iya nya ku iya? Sapa begunaka pesan iya? Pesan nya semina manah ke anak mit ke baru badu nusu!

¹⁰Iya nguji ngajar kitai urup beganti urup, ayat beganti ayat, pelajar beganti pelajar.”

¹¹ Enti kita enggai mendingka aku, Allah Taala deka ngena orang bansa bukai, ke bejaku ngena jaku ti nyelai, ngajar kita.

¹²TUHAN udah meri ngagai semua kita peluang belelak, enggau pengelantang diau, tang kita enggai mendingka Iya.

¹³Nya kebuah TUHAN deka ngajar kita urup beganti urup, ayat beganti ayat, pelajar beganti pelajar. Udah nya baru kita deka tesangkut tiap kali kita nyingkang. Kita deka bakal, disintak panjuk, lalu nyadi orang tangkap.

¹⁴Diatu kita tuai bansa ke merintah di Jerusalem ditu, pendingka utai ti disebut TUHAN.

¹⁵ Kita temegah madahka diri udah ngaga sempekat enggau pemati, lalu udah besetuju enggau dunya pemati. Kita ngarapka penusah ti deka datai enda nuntung kita, laban kita ngarapka pemula enggau jaku tipu kita ulih nyaga kita likun.

¹⁶ Nya alai tu utai ti disebut TUHAN ti Pemadu Tinggi, “Aku ngengkahka sigi batu pemun ti tetap sereta tegap di Sion. Dalam pemun nya Aku deka ngengkahka siti batu pemun ti tegap, ti udah ditulis enggau leka jaku tu, ‘Pengarap ti tegap sereta liat.’

¹⁷Pengelurus deka nyadika tali penyukat ke batu pemun nya, lalu pemetul ati deka nyadika tali kena ngabas penalam pengarap nya.” Ujan batu deka muai semua pemula ti dikarapka kita, lalu ai bah deka ngerusak pengelikun kita.

¹⁸Sempekat ti udah digaga kita enggau pemati deka dibuai, lalu utai ti udah dipesetujuka kita enggau dunya pemati, deka dibuai. Lebuh penusah ti besai datai, kita deka alah.

¹⁹Penusah nya deka nyerang kita enda ngetu-ngetu, pagi beganti pagi. Kita deka natka iya siang malam. Genap iti pesan ti baru ari Allah Taala, deka ngasuh kita takut baru!

²⁰Kita nyadi baka orang ke dikenang dalam Jaku-dalam, ke nguji nindukka diri ba katil ti enda chukup alai ngunjurka diri, ngena pua ti enda chukup kena mungkur diri.

²¹ TUHAN deka belaban baka ke dikereja Iya ba Bukit Perasim, enggau ba Emperan Gibeon, ngambika Iya ulih ngereja utai ti dikedekaka Iya, taja pen pengawa Iya nya baka ke nyelai. Iya deka nembuka pengawa Iya ti nyelai nya.

²²Anang ngeleseka jaku tangkan ti diberi aku ngagai kita! Enti kita ketawa, mar agi ga kita deka ngerarika diri. Aku udah ninga pemutus penemu TUHAN ti Pemadu Bekuasa ti deka ngerusak semua menua tu.

²³Pendingka utai ti disebut aku. Peratika utai ti dipadahka aku ngagai kita.

²⁴Orang bumai enda seruran ngeradu tanah, lalu enda seruran nyendiaka tanah alai nanam utai.

²⁵Lebuh sida udah nyendiaka tanah, sida nanam benih sayur baka dill enggau kumin. Sida nanam gandum enggau barli,[36] lalu ba tisi umai, sida nanam utai bukai.

²⁶Sida nemu jalai ngereja pengawa diri, laban Allah Taala udah ngajar sida.

²⁷Sida nadai kala ngena pemalu ti berat ngulihka leka dill tauka leka kumin, tang sida ngena kayu ti lempung ti numbas pemesai.

²⁸Lebuh sida nungku gandum, sida enda nungku gandum nya datai ke redak, lalu sida nemu chara nungku ngena kerita tarit ti dipejalaika sida ba atas gandum nya, tang enda ngeredakka leka gandum.

²⁹Semua penemu-dalam datai ari TUHAN ti Pemadu Bekuasa. Pelan ti digaga Allah Taala endang ngena, lalu semua pelan nya endang mujur belama.