Read Iban Isaiah 3 Bible Online

Isaiah 3 - Iban bible

Isaiah 3

¹Diatu TUHAN ti Pemadu Bekuasa baru deka ngerampas ari Jerusalem enggau ari menua Judah semua utai, enggau semua orang ke dikarapka orang mayuh. Iya deka ngerampas pemakai enggau ai sida,

²bujang berani sida, enggau bala soldadu sida, bala hakim enggau nabi sida, orang ke betilitka nasit, enggau bala tuai sida,

³bala tuai soldadu, enggau orang ke tinggi pangkat, orang politik, enggau semua orang ke tau keramat.

⁴TUHAN deka nejuka orang mayuh diperintah bala nembiak ti muda penemu.

⁵Semua orang deka ngambi ulih ba orang bukai. Orang ke biak enda masa sida ke tuai, lalu orang ke nadai guna, enda masa tuai sida.

⁶Maya deka datai alai bala ari genap raban peturun deka milih siku ari bala sida, lalu bejaku munyi tu, “Nuan bisi gari, nya alai nuan meh nyadi tuai kitai lebuh maya penusah tu diatu.”

⁷Tang iya deka nyaut, “Aku enggai! Aku enda ulih nulung kita. Aku pen nadai mega pemakai tauka gari. Anang ngasuh aku nyadi tuai kita!”

⁸Jerusalem deka diukum! Judah deka alah! Semua utai ti disebut tauka dikereja sida endang ngelaban TUHAN magang. Sida endang enda belalai mechat Allah Taala.

⁹Ati sida ke bingkuk deka dikena ngelaban sida empu. Sida bedosa di mua orang mayuh baka orang Sodom. Tulah meh sida, laban sida endang minta diri ditinggang penusah tu.

¹⁰Padahka ngagai orang ke lurus sida deka gaga ati laban sida deka nerima upah ketegal utai ti dikereja sida.

¹¹Tulah meh orang ke jai! Utai ti udah dikereja sida ngagai orang bukai, deka dikereja ngagai sida empu.

¹²Orang ke nyali duit ngagai bala nembiak Aku nekanka pengidup sida, lalu orang ke alai sida berutang, ngakal sida. O nembiak Aku, bala tuai kita nesatka kita, ngambika kita enda nemu kini ke tunga kita patut nguing.

¹³TUHAN sedia deka bejakuka pekara Iya. Iya sedia deka ngakim bala nembiak Iya.[6]

¹⁴TUHAN ngakim bala tuai bansa enggau bala tuai nembiak Iya. Ku Iya besalah sida: “Kita udah ngerampas buah ari kebun anggur, lalu rumah kita nyau penuh laban utai ti udah dirampas kita ari orang ke seranta.

¹⁵Kita nadai patut ngenusahka bala nembiak Aku, lalu ngambi ulih ba orang ke seranta. Aku TUHAN ti Pemadu Bekuasa, udah bejaku.”

¹⁶Ku TUHAN bejaku, “Peda kita penyumbung indu orang Jerusalem! Idung sida nungas ke langit lebuh sida bejalai. Sida seruran nundi lelaki. Singkang sida pandak, lalu gelang ti ba kaki sida nyau sering-sering.

¹⁷Tang Aku deka ngukum sida. Aku deka ngukur pala sida, lalu nejuka sida lasu.”

¹⁸Maya deka datai alai TUHAN deka ngerampas ari indu orang Jerusalem semua utai ti ngasuh sida sumbung - perengka emas ti dikena sida ba buku-ali, ba pala, ba rekung,

¹⁹enggau ba jari sida. Iya deka muai tambai mua sida

²⁰enggau selapuk, jimat ba lengan, enggau ba punggung sida,

²¹tinchin ti ba tunjuk, enggau ba idung sida,

²²semua gari sida ke manah, baju panjai, baju luar, enggau sarang duit sida,

²³baju panjai ti senayau, perecha linin, kain ti dikena sida malut rekung, enggau kain ti dikena sida nudung pala.

²⁴Diatu sida ngena minyak wangi, tang ila sida deka bebau but. Diatu sida ngena belulang ti manah, tang ila sida deka ngena tali ti kasar nyadika belulang sida. Diatu buk sida manah, tang ila pala sida deka lasu. Diatu sida begari ngena kain ti manah, tang ila sida deka ngena kain ti charik. Diatu sida bajik, tang ila sida deka jai gamal!

²⁵Bala lelaki ke di nengeri nya, orang ke pemadu kering, deka mati beperang.

²⁶Pintu nengeri deka ngulit sereta nyabak, lalu nengeri nya empu deka nyadi baka indu ke telanjai duduk malai tanah.