Read Iban Isaiah 30 Bible Online

Isaiah 30 - Iban bible

Isaiah 30

¹TUHAN udah bejaku munyi tu: “Tulah meh orang ke megai perintah di menua Judah, laban sida angkat ngelaban Aku. Sida nitihka pelan ti ukai digaga Aku, lalu begagaka sempekat ti ngelaban peneka Aku, lalu nugungka dosa sida.

²Sida mansang ngagai menua Ejip minta tulung, lalu enda minta jaku lalau ari Aku. Sida ngasuh Ejip nyaga sida, nya alai sida manggaika pengarap sida ba raja menua Ejip.

³Tang raja nya nadai kuasa nulung sida, lalu pengawa orang Ejip ti nyaga sida deka mai penusah ti besai.

⁴Taja pen bala pengari bansa udah datai ba nengeri orang Ejip ke benama Zoan enggau Hanis,

⁵orang Judah deka nesal ati ke diri ti udah ngarapka bansa ti enda tau dikarapka, bansa ti udah ngelebuka sida, lebuh sida ngarapka diri bisi orang nulung.”

⁶Tu pesan Allah Taala pasal jelu ti diau di menua puang di selatan: “Bala pengari bansa bejalai nengah menua ti tau ngasuh bebadi, ti alai singa diau, sereta bisi ular ti bisa enggau naga ti terebai. Sida mai pemeri ti berega ngena keledai enggau jelu unta, ngagai bansa ti enda ulih nulung sida.

⁷Tulung ti diberi orang Ejip sigi nadai guna. Nya alai Aku udah ngumbai Ejip, ‘Naga Ti Enda Tau Nganu.’ ”

⁸Allah Taala ngasuh aku nuliska dalam siti bup gaya orang tu, kena ngingatka penyai sida belama iya.

⁹Sida seruran angkat ngelaban Allah Taala, seruran bula, seruran enggai mendingka ajar TUHAN.

¹⁰Sida nagang bala nabi bejaku. Ku sida, “Anang bejaku ngagai kami pasal utai ti ngena. Padahka ngagai kami utai ti deka didinga kami. Awakka kami majak nipu diri empu.

¹¹Anang nekul kami; anang mempang jalai kami. Kami enggai ninga pasal Allah Taala kita ke kudus, ke disembah orang Israel.”

¹²Tang tu utai ti disebut Allah Taala ke disembah orang Israel ti kudus: “Kita nulak utai ti dipadahka Aku ngagai kita, lalu kita manggaika pengarap kita ba pengawa kita ke nekanka pengidup enggau nipu orang.

¹³Nya alai kita salah. Kita baka dinding ti tinggi, ti merekah ari atas ke baruh. Kita deka runtuh enggau ngenyit.

¹⁴Kita deka redak baka periuk tanah datai ke kerimpak iya nadai chukup besai kena ngumpul bara api, tauka kena ngauk ai ari tepayan.”

¹⁵Laban TUHAN ti Pemadu Tinggi, Allah Taala ke disembah orang Israel ti kudus udah bejaku: “Pulai baru ngagai Aku, lalu panggaika pengarap kita ba Aku. Nya baru kita deka kering sereta likun.” Tang kita enggai.

¹⁶Lalu kita bekira ngerarika diri ari munsuh kita ngena kuda ti laju. Kita endang patut rari! Kita ngumbai kuda kita chukup laju, tang munsuh ke begagaika kita laju agi ari nya!

¹⁷Seribu iku kita deka rari lebuh kita tepedaka siku munsuh, lalu lima iku munsuh chukup ngasuh semua kita rari. Nadai utai agi tinggal ari bala soldadu kita, kelimpah ari siti tiang menira ti ba tuchung bukit.

¹⁸Tang taja pia, TUHAN nganti maya Iya deka kasihka kita. Iya sedia deka kasihka kita, laban Iya endang seruran ngereja utai ti ngena. Beberekat meh orang ke manggaika pengarap sida ba TUHAN.

¹⁹Kita ti diau di Jerusalem enda agi nyabak ila. TUHAN endang kasih, lalu lebuh kita nyabak minta Iya nulung kita, Iya deka nyaut kita.

²⁰TUHAN deka ngasuh kita ngasaika pemerinsa, tang Iya Empu deka bisi dia ngajar kita, lalu kita enda ibuh begigaka Iya agi.

²¹Enti kita limpang ke kanan tauka ke kiba, kita deka ninga munyi nyawa Iya bejaku ari belakang kita, “Tu jalai. Titi jalai tu.”

²²Kita deka mai engkeramba kita ke disampak enggau pirak, enggau engkeramba kita ke disampak enggau emas, lalu kita deka muai sida baka ke muai utai ti kamah, lalu manjung, “Rari kita ari aku!”

²³Genap kali kita nanam utai, TUHAN deka ngasuh hari ujan ngambika utai nya tumbuh, lalu Iya deka ngasuh kita bulih ngetau, lalu kita deka mayuh rumput ke jelu tupi kita.

²⁴Jelu sapi ti lelaki, enggau keledai ti ngeradu tanah umai kita, deka makai pemakai ti pemadu manah.

²⁵Ba hari nya, lebuh kuta munsuh kita alah, lalu bala sida dibunuh, ai deka rarat ari genap igi bukit enggau munggu baka sungai.

²⁶Bulan deka manchar terang baka mata hari, lalu mata hari deka tujuh kali terang agi ari selama, baka penerang tujuh hari dipegulaika. Semua utai tu deka nyadi lebuh TUHAN malut lalu ngeraika telih ti udah dikena Iya ngemakalka bala nembiak Iya.

²⁷Kuasa enggau mulia TUHAN ulih dipeda ari jauh. Api enggau asap mandangka pengeringat TUHAN. TUHAN bejaku, lalu leka jaku Iya ngangus baka api.

²⁸Iya ngasuh ribut muput di mua Iya baka ai bah ti nabanka semua utai. Ribut nya ngerusak semua bansa, lalu ngemuntanka semua pelan sida ke jai.

²⁹Tang kita ke nembiak Allah Taala, deka lantang ati sereta belagu baka ke dikereja kita lebuh malam gawai ti kudus. Kita deka gaga ati baka orang ke bejalai nitihka rentak munyi kesuling, lebuh kita mansang ngagai Rumah TUHAN ti penyaga orang Israel.

³⁰TUHAN deka ngasuh genap iku orang ninga munyi nyawa Iya, sereta ngasaika pengeringat Iya. Api, kabut, ujan batu, enggau ujan ti bangat deka nyadi.

³¹Orang Asiria deka balat takut lebuh sida ninga munyi nyawa TUHAN, lalu ngasaika kuasa ukum Iya.

³²Lebuh TUHAN enda ngetu-ngetu malu sida, bala nembiak Iya deka nitihka munyi rentak palu nya ngena dedumbak enggau belikan. Allah Taala empu deka ngelaban orang Asiria.

³³Dulu kelia siti endur udah disediaka, alai api ti mau deka nunu raja menua Asiria. Endur nya amat dalam sereta besai, penuh laban kayu api. TUHAN deka ngesuhka entali api kena Iya nyelup tugung kayu nya.