Read Iban Isaiah 31 Bible Online

Isaiah 31 - Iban bible

Isaiah 31

¹Tulah meh orang ke minta diri ditulung orang Ejip! Sida manggaika diri ba kuasa bala soldadu orang Ejip - kuda, kerita perang, enggau bala soldadu. Tang sida enda manggaika diri ba TUHAN Allah Taala ti kudus ke disembah orang Israel, tauka minta Iya nulung sida.

²TUHAN nemu utai ti dikereja Diri! Iya ngasuh penusah ti besai nyadi. Iya ngamatka jaku emba Iya ti deka ngukum orang ke jai, sama enggau orang ke nyaga sida.

³Orang Ejip ukai petara. Sida semina mensia aja. Kuda sida lemi. Lebuh TUHAN gawa, bansa ti kering deka alah, lalu bansa ti lemi ti ditulung sida, deka alah. Sida deka sama dirusak.

⁴Ku TUHAN bejaku ngagai aku, “Baka ni pen pemendar pengibun bedus merakka nyawa sereta manjung, enda meh sida ulih muru singa ari jelu ti udah dibunuh iya. Baka nya meh Aku. Nadai utai ulih nagang Aku, TUHAN ti Pemadu Bekuasa, nyaga Bukit Sion.

⁵Baka burung ti terebai ari atas tansang nyaga anak iya, baka nya meh Aku TUHAN ti Pemadu Bekuasa, deka ngelindung Jerusalem, lalu nyaga iya.”

⁶Ku Allah Taala bejaku, “Orang Israel, kita udah bedosa ngelaban Aku, lalu nyakal Aku. Tang diatu, pulai meh kita baru ngagai Aku!

⁷Maya deka datai alai semua kita deka muai engkeramba ti digaga kita ari pirak enggau emas.

⁸Asiria deka dirusak lebuh maya beperang, tang ukai laban kuasa mensia. Orang Asiria deka rari ari perang nya, lalu sida ke bujang deka digaga nyadi ulun.

⁹Raja sida deka rari laban balat takut, lalu bala pemesai deka panik lalu ninggalka menira perang sida.” TUHAN udah bejaku - TUHAN ti disembah di Jerusalem sereta bempu api ti menyadi kena nunu piring dia.