Read Iban Isaiah 32 Bible Online

Isaiah 32 - Iban bible

Isaiah 32

¹Jemah ila siku raja deka merintah enggau ati ti rentang, lalu bala tuai bansa deka megai perintah ngena atur ti lurus.

²Genap iku sida deka baka dunju ti alai orang ngenduhka diri ari ribut, enggau endur alai belalai ari kabut. Sida deka baka sungai ti rarat di menua puang, baka ayuk batu ti besai di menua ti ngalan nadai kayu.

³Mata enggau pending sida deka tebuka lalu sida deka nemu utai ti dipeguna orang mayuh.

⁴Sida ke enda liat ati, deka liat ati, lalu sida ke bejaku kat-kat deka bejaku enggau terang.

⁵Nadai orang deka ngumbai orang ke beli patut dibasa, tauka ngumbai orang ke jai ngembuan ati ti betul.

⁶Orang ke beli bejaku mapap, lalu iya berundingka penyai ti deka dikereja iya. Utai ti dikereja iya, enggau utai ti disebut iya, endang mechat TUHAN, lalu iya nadai kala meri pemakai ngagai orang ke lapar, tauka meri utai diirup ngagai orang ke aus.

⁷Orang ke beli endang jai, lalu iya ngereja penyai. Iya bepekat deka ngerusak orang ke seranta ngena pemula, lalu nagang sida bulih hak sida.

⁸Tang orang ke tau dibasa, ngereja utai enggau ati ti betul, lalu bediri tegap ngeringka utai ti ngena.

⁹Kita indu ke diau lantang, ti nadai pengirau, pendingka utai ti disebut aku.

¹⁰Kita nyangka puas ati diatu, tang ba urung maya tu taun baru tu ila, kita deka tusah ati laban kita nadai buah anggur digumpul.

¹¹Kita udah nyamai diau, nadai pengirau, tang diatu kita deka getar-getar takut! Buka gari kita, lalu tanchangka gari kain ba punggung kita.

¹²Pandam dada kita kena ngayanka kita tusah ati, laban tanah umai kita ke ami, enggau kebun anggur kita udah dirusak,

¹³lalu madang duri enggau unak tumbuh ba tanah bala nembiak Aku. Nyabak meh kita ke semua rumah ti udah alai orang lantang diau, enggau nengeri ti udah richah.

¹⁴Indah istana deh deka ditinggalka, lalu indu nengeri nadai orang nguan. Rumah enggau kuta ti nyaga sida deka nyadi tembawai belama iya. Keledai kampung deka bejalai segau-segau dia, lalu jelu bedus deka ngulam dia.

¹⁵Tang Allah Taala deka sekali agi ngirumka Roh Iya ngagai kitai. Menua ti kusi deka nyadi ami baru, lalu umai deka mansutka mayuh asil.

¹⁶Di semua endur dalam menua nya, pengelurus enggau atur ti lurus deka dipejalaika.

¹⁷Menua deka ngasaika pemaik enggau pengelikun belama iya laban genap iku orang deka ngereja utai ti ngena.

¹⁸Bala nembiak TUHAN nadai agi pengirau, lalu rumah sida bisi pemaik enggau pengelikun. (

¹⁹Tang ujan batu deka labuh ninggang utan, lalu nengeri deka runtuh.)

²⁰Naka meh pengelantang semua orang ke mayuh ai kena manjah utai ti ditanam, enggau padang rumput alai keledai enggau sapi tau diau likun.