Read Iban Isaiah 33 Bible Online

Isaiah 33 - Iban bible

Isaiah 33

¹Tulah meh bala munsuh kitai! Sida udah ngerumpak lalu nipu bansa diri, taja pen orang nadai udah ngerumpak tauka nipu sida. Tang peluang alai sida ngerumpak enggau nipu deka abis, lalu sida empu deka ditipu sereta dirumpak.

²TUHAN, kasihka kami. Kami udah manggaika pengandal ati kami ba Nuan. Jaga meh kami siang malam, lalu selamatka kami lebuh maya tusah.

³Lebuh Nuan beperang ngarika kami, semua bansa deka rari ninga munyi perang nyadi.

⁴Reta tengkira sida dirampas lalu ditabanka nyadi perapasan.

⁵Naka meh pemesai kuasa TUHAN! Iya merintah semua utai. Iya deka nirika atur ti lurus enggau ati ti rentang di Jerusalem

⁶lalu meri pemaik ngagai orang Israel. Iya endang seruran nyaga nembiak Iya, lalu meri sida pemintar, enggau penemu. Pesaka sida ke pemadu besai nya ati ti nangika TUHAN.

⁷Orang ke berani, ngangau minta tulung. Bala pengari bansa ke nguji ngiga pemaik, nyau bekeduie nyabak.

⁸Jalai raya balat mai penusah, datai ke orang nyau nadai agi berani nengah sida. Orang mungkir ari sempekat enggau semaya. Orang nyau nadai bebasaka pangan diri agi.

⁹Menua nadai dipumai agi sereta nadai orang nguan. Utan di menua Lebanon udah layu. Emperan Saron ti ami, nyau baka menua puang, lalu daun kayu ruruh di Basan enggau ba Bukit Karmel.

¹⁰Ku TUHAN bejaku ngagai mayuh bengkah bansa, “Diatu Aku deka ngereja utai siti. Aku deka ngayanka pemesai kuasa Aku.

¹¹Kita ngaga pelan ti nadai guna, lalu semua utai ti dikereja kita nadai guna magang. Roh Aku deka mau baka api lalu ngerusak kita.[37]

¹²Kita deka nyadi baka batu ti ditunu nyadi kapu, baka duri ti ditunu nyadi amau.

¹³Awakka semua orang ke semak enggau ke jauh, ninga pasal utai ti udah dikereja Aku, lalu ngaku pemesai kuasa Aku.”

¹⁴Orang ke bedosa ke diau di Sion getar-getar takut. Ku sida, “Ukum ti diletak TUHAN nya baka api ti menyadi belama iya. Kati kitai ulih idup natka api ti baka nya?”

¹⁵Kita ulih idup enti kita nyebut lalu ngereja utai ti ngena. Anang ngelakar orang ke seranta ngena kuasa kita, lalu anang makai suap. Anang begulai enggau orang ke bekira deka bebunuhka orang, tauka ngereja penyai ti bukai.

¹⁶Nya baru kita deka diau likun. Kita deka diau likun baka ke diau dalam kuta ti tegap. Kita deka bisi pemakai, enggau utai diirup.

¹⁷Kita deka, sekali agi, meda siku raja ti temegah merintah siti menua ti ngerembai kia-kia.

¹⁸Penakut kita ke orang pengumpul chukai ke datai ari menua bukai, enggau orang ke pematau suba, semina disimpan dalam pengingat kita aja.

¹⁹Kita enda agi meda orang bansa bukai sumbung, ke bejaku ngena jaku ti enda ditemu kita.

²⁰Peda nengeri Sion, nengeri ti alai kitai ngintu gawai pengarap kitai. Peda nengeri Jerusalem! Iya deka nyadi endur ti likun alai diau! Iya deka nyadi baka langkau kain ti enda kala dipindahka, ti bisi tiang bantil ti nadai kala dichabut, lalu tali bantil ti nadai kala putus.

²¹TUHAN deka ngayanka mulia Iya ngagai kitai. Kitai deka diau ba tebing sungai ti besai, enggau sungai ti mit, tang kapal munsuh enda ulih belayar ba sungai nya.

²²Semua tali layar ba kapal nya enda ulih dikena. Layar enda ulih dikerembaika! Kitai deka ngerampas semua pengaya bala soldadu munsuh, lalu pengaya nya mayuh datai ke orang ke kait-kupit bisi diberi ungkup ari utai nya. TUHAN Empu deka nyadi raja kitai. Iya deka merintah sereta nyaga kitai.

²⁴Nadai orang ke diau dalam menua kitai deka mutap madahka diri sakit, lalu semua dosa deka diampun magang.