Read Iban Isaiah 34 Bible Online

Isaiah 34 - Iban bible

Isaiah 34

¹Datai kitu meh semua bansa! Begempuru lalu mending. Awakka dunya, enggau semua orang ke diau di dunya, datai kitu lalu mending.

²TUHAN ringat ngagai semua bansa, enggau ngagai semua bala soldadu sida. Iya udah ngukum lalu ngerusak sida.

³Bangkai sida enda dikuburka tang deka garing-garing bebau but, lalu bukit deka mirah laban darah.

⁴ Mata hari, bulan enggau bintang deka pechah nyadi amau. Langit deka lesap baka surat ti digulung, lalu bintang deka labuh baka daun anggur tauka daun kana ti ruruh.

⁵ TUHAN udah nyendiaka pedang Iya di serega, lalu diatu pedang nya deka mantap Edom, orang ke udah diukum ngambika sida dirusak.

⁶Pedang TUHAN deka dibalut darah enggau lemak, baka darah enggau lemak anak bedus enggau kambin ti diberi nyadika piring. TUHAN deka ngenjuk piring tu ba nengeri Bosrah. Iya deka ngasuh mayuh orang dibunuh di menua Edom.

⁷Orang mayuh deka mati baka sapi kampung, enggau sapi ti lelaki ti agi biak, lalu dunya deka mirah laban darah, sereta dibalut lemak.

⁸Tu meh maya TUHAN deka ngelepaska Sion lalu malas bala munsuh iya.

⁹Sungai di menua Edom deka bebali nyadi tar, lalu tanah dia deka bebali nyadi merirang. Semua menua nya deka diempa api baka tar.

¹⁰ Iya deka diempa api siang malam, lalu asap deka pansut ari iya belama iya. Menua nya deka nyadi kusi belama iya, lalu nadai agi orang deka bejalai nengah menua nya.

¹¹Burung puk enggau burung kak deka nguan menua nya. TUHAN deka sekali agi ngaga menua nya nyadi menua ti ngalan nadai utai tumbuh, baka lebuh maya Iya ke apin ngaga dunya kelia.

¹²Raja nadai megai perintah di menua nya, lalu bala tuai pen nadai mega agi.

¹³Duri enggau tekurak deka tumbuh ba semua istana enggau semua nengeri ti bekuta, lalu jelu pasun enggau burung puk deka nguan endur nya.

¹⁴Jelu babas deka bekesegau bejalai ba menua nya, lalu bala antu deka bekangauka pangan diri. Antu malam[38] deka datai kia ngiga endur alai belelak.

¹⁵Burung puk deka ngaga tansang sida dia, betelu, meram telu, lalu ngintu anak sida dia. Burung ti bepakaika bangkai, deka begelumu dia betangkan-tangkan.

¹⁶Giga dalam bup TUHAN nama semua utai ti idup ti udah ditulis, lalu bacha utai ti disebut dia. Nadai siku utai ti idup nya deka lenyau tauka nadai sulu, laban TUHAN Empu udah ngasuh utai nya nyadi baka nya. TUHAN Empu deka ngasuh sida diau begulai.

¹⁷TUHAN deka magi menua nya ngagai sida, lalu meri ungkup ngagai sida siku-siku. Sida deka diau di menua nya belama iya, lalu menua nya deka diempu sida belama iya.