Read Iban Isaiah 36 Bible Online

Isaiah 36 - Iban bible

Isaiah 36

¹Dalam taun ti keempat belas Hesekiah nyadi raja menua Judah, Senakerip, raja menua Asiria, nyerang lalu ngalahka mayuh bengkah nengeri ti bekuta di menua Judah.

²Udah nya iya ngasuh tuai pemesai iya mansang ari Lakis ngagai Jerusalem, mai bala soldadu, mejalka Raja Hesekiah nunduk. Pemesai nya bediri ba endur alai orang ke ngaga kain, ba tebing parit ti mai ai ari letung ti di atas.

³Tiga iku orang Judah pansut betemu enggau iya. Sida tiga nya pemesai ke ngemataka istana, Eliakim anak Hilkiah; kerani kot, Sebna; enggau Joah anak Asap ti nyadi tukang tulis raja.

⁴Pemesai orang Asiria nya madahka raja nya keran deka nemu kebuah Raja Hesekiah kempang ati baka nya.

⁵Ku pemesai orang Asiria nya bejaku, “Kati kita ngumbai leka jaku ulih nganti pengelandik enggau pengering beperang? Dalam runding kita, sapa deka nulung kita angkat ngelaban Asiria?

⁶ Kita ngarapka Ejip nulung kita, baka orang ke betungkat ngena buluh ti patah, ti deka ngachuk jari iya. Nya meh gaya raja menua Ejip lebuh orang ngarapka iya.”

⁷Ku pemesai orang Asiria nya nampung jaku iya, “Tauka, kita madahka diri deka ngarapka TUHAN Allah Taala kita? Indah Hesekiah empu deh udah ngerusak berapa buah rumah sembiang TUHAN enggau alta lebuh iya ngasuh orang Judah enggau orang di Jerusalem nyembah TUHAN ba siti alta aja.

⁸Aku deka betawar enggau kita dalam nama raja. Aku deka meri kita dua ribu iku kuda, enti kita bisi tetemuka orang ke ngemayuh nya nepan sida.

⁹Indah pemesai Asiria ke pemadu baruh pangkat deh enda ulih dilaban kita. Nya alai nama kebuah kita ngarapka orang Ejip deka ngirumka kerita perang enggau bala soldadu ti nepan kuda ngagai kita?

¹⁰Kati kita ngumbai TUHAN nadai nulung aku nyerang lalu ngerusak menua kita? TUHAN Empu ke ngasuh aku nyerang lalu ngerusak menua kita.”

¹¹Udah nya Eliakim, Sebna, enggau Joah lalu bejaku enggau pemesai nya, “Bejaku ngena jaku bansa Aram enggau kami. Kami meretika jaku nya. Anang bejaku ngena jaku Hebrew. Semua orang ke ba dinding kuta mending magang.”

¹²Ku pemesai nya nyaut, “Kati kita ngumbai raja ngasuh aku bejaku semina enggau kita sereta enggau raja kita aja? Ukai, aku mega bejaku enggau orang mayuh ke duduk ba atas dinding kuta, ti deka makai tai lalu ngirup ai kemi diri, baka kita empu ila.”

¹³Udah nya pemesai nya bediri, lalu bejaku enggau nyawa ti inggar ngena jaku Hebrew, “Pendingka utai ti dipadahka raja menua Asiria ngagai kita.

¹⁴Iya meri kita jaku tangkan, enda ngasuh kita nejuka Hesekiah ngelakar kita. Hesekiah enda ulih ngelepaska kita.

¹⁵Lalu anang nejuka iya mujuk kita ngarapka TUHAN. Anang ngumbai TUHAN deka ngelepaska kita, lalu nagang soldadu orang Asiria ngalahka nengeri kita.

¹⁶Anang mendingka Hesekiah! Raja besai menua Asiria ngasuh kita pansut ari nengeri, lalu nunduk. Semua kita deka dikemendarka makai buah anggur enggau buah ara kita empu, lalu ngirup ai ari telaga kita empu,

¹⁷nyentuk ngagai maya raja ngentapka kita ba siti menua ti sebaka enggau menua kita empu, ti bisi kebun anggur alai kita bulih wain, lalu bisi gandum kena kita begagaka roti.

¹⁸Anang nejuka Hesekiah ngelakar kita ngasuh kita ngumbai TUHAN deka ngelepaska kita. Kati petara orang bansa bukai bisi udah kala ngelepaska bansa sida ari jari raja menua Asiria?

¹⁹Dini alai bala petara nya diatu, petara orang Hamat enggau Arpat? Dini alai bala petara orang Sepabaim? Kati orang bisi udah ngelepaska Samaria?

²⁰Kemaya bala petara semua menua nya udah bisi kala ngelepaska menua sida ari jari raja? Nya alai nama kebuah kita ngumbai TUHAN ulih ngelepaska Jerusalem?”

²¹Nitihka atur Raja Hesekiah, orang mayuh lalu enda bemunyi. Sida nadai bejaku seleka.

²²Udah nya Eliakim, Sebna, enggau Joah lalu nyarikka gari diri, lalu mansang madahka ngagai raja utai ti udah disebut pemesai orang Asiria nya.